Əməkdar artist Abbas Bağırov Gəncə şəhərində küçədə döyülərək aldığı ağır kəllə-beyin travmasından vəfat edən 18 yaşlı Elgün İbrahimovla bağlı çağırış edib.
1xeber.media xəbər verir ki, bu barədə ifaçı sosial media hesabında yazıb.
"Bir səs, bir harayda Elgün üçün yüksəlsin. Türkiyədə baş verən hər hadisə gündəmə gətirilir, ədalət axtarılır, haqq tələb olunur. Bəs, biz niyə susmalıyıq? İndi zamanıdır. Səssiz qalmamalıyıq. Bu vəhşiliyi törədənlər layiq olduqları ən ağır cəzanı almalıdırlar. Ədalət gecikməməlidir. Çünki bir uşaq, bir Elgün baxır bizə səssizcə... Onun haqqı, yaşanmamış həyatı üçün susmamlıyıq. Ədalət yerini tapsın. Elgün üçün susmayaq".
Qeyd edək ki, Elgün Gəncədəki 34 saylı məktəbin 11-ci sinif şagirdi olub. Onun şəhərin M.Xəlilov küçəsində dava-dalaş zamanı başından xəsarət aldığı bildirilib. Ona xəstəxanada qapalı kəllə-beyin travması, qarının və bədənin müxtəlif nahiyələrinin küt travması diaqnozları təyin edilib. Elgün aldığı xəsarətlərdən xəstəxanada vəfat edib.
Bir neçə gün öncə mətbuata açıqlama verən mərhumun dayısı Rövşən Zeynalov Elgünün döyülərək tanınmaz hala salındığını deyib:
“Başı yox idi uşağın. Tikə-tikə idi, tanınmaz halda... Gözü yerdə imiş. Ciyəri partlayıb, ağciyəri, qaraciyəri... Qabırğaları qırıq-qırıq idi. Bu, insan işi deyil. Döyülübsə də, dəmirlə döyüblər. Amansızcasına, vəhşicəsinə... Uşaq universitetə hazırlaşırdı, bizim ümidimiz idi. İmtahanının birini vermişdi. Davakar deyildi, bir az zəif uşaq idi. Oxumağa meyilli, çox savadlı idi”.
