Milli Məclisin deputatı Səyyad Aran modern.az-a açıqlamasında yüksək maaşına rəğmən, avtomobil ala bilmədiyini deyib. Onun bu sözləri ictimaiyyətdə birmənalı qarşılanmayıb.
Sitat: “Deyirsiniz ki, deputatsan. Tutaq ki, 5 min manat maaş alıram. Mənim də qayğılarım var, həyat yoldaşım, nəvələrim…Gündəlik, səhhətlə əlaqəli xərclərimiz var. Pulu alırsan, müalicələrə gedir. Mən oradan nə qənaət edib, pul yığıb maşın ala bilərəm?”
Maşın almaq üçün nə qədər vəsait tələb olunur?
Globalinfo.az-a danışan iqtisadçı Natiq Cəfərli deyib ki, 5 min manat kifayət qədər yaxşı maaşdır və deputat bununla özünə avtomobil ala bilər:
“Burada başqa bir sual yaranır. Ölkədə minimum əməkhaqqı 400 manatdır. Rəsmi qaydada işləyənlərin yarısı 525 manat maaş alır. Onlar nə etsinlər? Belə çıxır ki, həmin vətəndaşların, nəinki, kreditlə avtomobil almağa, heç dərmana belə pulları çatmır. Millət vəkilləri bu haqda da düşünməlidirlər. Azərbaycan reallığında 5 min manat kifayət qədər yüksək məbləğdir. Xərcləri normal planlaşdırdıqda, kreditlə avtomobil əldə etmək mümkündür”.
İqtisadçı bildirib ki, hazırda bu sahədə fərqli təkliflər var:
“Aylıq ödənişi 400 manat olan avtomobil də var və ya daha yüksək rəqəmlərdən də danışmaq olar. Bu, markadan asılı olaraq dəyişir. Məsələn, elə Çin istehsalı olan maşını hər ay 500 manat ödəməklə almaq mümkündür”.
