Ötən günlərdə Riyaziyyat və Mexanika İnstitutunun direktoru, keçmiş təhsil naziri professor Misir Mərdanov azpolitika.info saytına müsahibə verib.
1xeber.media Tribunainfo.az-a istinadla xəbər verir ki, sabiq nazir hazırkı təhsil naziri Emin Əmrullayevlə münasibətlərindən, təhsilin vəziyyətindən və digər mövzulardan danışıb.
Qeyd edək ki, sözügedən müsahibə həm inciklik tonunda, həm də tərəflər arasında münasibətlərin yumuşalması fonu ilə müşahidə olunub.
Keçmiş deputat, təhsil üzrə ekspert Etibar Əliyev isə özünün sosial şəbəkə hesabında bununla bağlı fikirlərini paylaşıb. Daha dəqiq desək, hər iki naziri daha çox ələ salmağa çalışıb. O qeyd edib ki, Misir Mərdanovun müsahibəsində iki sual-cavab diqqətini çəkib. Həmin suallar isə “Riyaziyyat və Mexanika İnstitutu Elm və Təhsil Nazirliyinin tabeliyinə keçdikdən sonra keyfiyyət baxımından hansı dəyişikliklər olub?” və “Nazir Emin Əmrullayev bu günlərdə deyib ki, indiki problemlər 20 il əvvəl yol verilən nöqsanlarla bağlıdır. Söhbət elm və təhsildəki hansı nöqsanlardan gedir? Nazir 20 il əvvəlki neqativ hallar deyərkən, layiq olmayan şəxslərin elm, təhsil sahəsinə gətirilməsini, diplomların rüşvətlə verilməsini nəzərdə tutur”dan ibarət olub.
Etibar Əliyev qeyd edib ki, bu gün yaranmış imkanlardan səmərəli istifadə etməli, problemlərin həlli üzərində dayanmalıdırlar. “Yoxsa keçmişə dönüb kiminsə günahını axtarmaqla heç nəyə nail olmaq olmaz”.
Keçmiş deputat bunun ardından hər iki şəxsə yönəlik sarkazm dolu fikirlərini də qeyd edib. “Hörmətli Misir müəllim! Emin məllim bir dəfə də demişdi ki, təhsildə islahatlar 30 ildən sonra nəticə verir. Əmrullayevin elmi-statistik və analitik təhlillərinə görə sizin apardığınız islahatlar 2030-cu ildə öz bəhrəsini verməlidir. Sadəcə indiki nazir tələskənliyə yol verib və kalkulyatorda hesablamayıb ki, hələ 30 ilin tamamına 5 il qalıb.
Emin məllimin apardığı islahatlar isə inşallah, 2050-ci ildə bəhrə verməlidir.
Məncə əsas məsələ əl-ələ verib işləməkdir. Axı təhsil konservativ sistemdir”
