Kiçik və Orta Biznesin İnkişafı Agentliyi (KOBİA) katibliyinin sədr müavini Əmir Şirinbəyli evindən 244 min manatlıq qızıl-zinət əşyaları oğurlanıb.
Məlumata görə bu oğurluğu onun evində xadimə işləyən Ruhiyyə Məmmədova adlı şəxs edib.
Oğurluğu edən şəxs tutulsa da, Əmir Şirinbəyli şikayətçi olmaması ilə bağlı notarial qaydada ərizə verib.
Gununsesi.info-ya daxil olan məlumatda deyilir ki, Əmir Şirinbəyli vaxtilə evində xadimə işləmiş Məmmədovanın həbsdən buraxılmasını istəyib.
Zərərçəkmiş qismində tanınan məmur məhkəməyə ərizəsində qarşı tərəflə barışdığını göstərib, ona azadlıqdan məhrumetmə yox, alternativ cəza verilməsini xahiş edib.
Əmir Şirinbəylinin evindən 2024-cü ilin payızında ümumilikdə 244 min 790 manat dəyərləndirilən çoxsaylı qızıl-zinət əşyaları oğurlanıb.
1xeber.media Gununsesi.info-ya istinadla həmin əşyaların siyahısını təqdim edir:
“PASQUALE BRUNİ” firmasına məxsus 33 min 410 manat dəyərində “Giardini Secretis” qızıl üzüyü, eyni firmaya məxsus və həmin dövrün məzənnəsi ilə 47 min 626 manat dəyərləndirilən (25 min 190 avro) “Giardini Secreti” qızıl sırğa, “ROBERTO COİN” firmasına məxsus 3 min 930 manatlıq bilərzik, həmin firmadan 10 min 890 manatlıq sırğa, “MESSİKA” firmasına məxsus, hər biri 10 min 620 manat dəyərləndirilən iki boyunbağı, bu firmadan 4 min 350 manatlıq “Lucky Eye” bilərziyi və 5 min manatlıq daha bir bilərzik, 7 min 325 manatlıq “Move Noa” üzüyü, 1700 manatlıq tək almaz qaşlı üzük, “Cartier” firmasına məxsus, dəyəri 1250, 1940, 4100 dollar olan müxtəlif üzüklər, bu firmanın 7 min 395 manat (4350 dollar) dəyərində sırğası, eyni firmanın 13 min 600 manatlıq (8000 dollar) qolbağı, “Van Cleef” firmasına məxsus, 15 min 700 manatlıq (7000 funt) bilərzik, eyni firmaya aid 20 min manatdan çox dəyərində (9000 funt) boyunbağı və 24 min 700 manatlıq (11 min funt) sırğa.
Məmurun evində xadimə işləmiş 48 yaşlı Ruhiyyə Məmmədova bildirib ki, qızı xərçəng xəstəsidir, onun müalicəsi üçün bu addımı atıb. Bakı Ağır Cinayətlər Məhkəməsinin hökmü ilə o, 5 il 6 ay azadlıqdan məhrum edilib. Əmir Şirinbəyli ona alternativ cəza verilməsi barədə ərizəni apellyasiya məhkəməsinə göndərib. Bakı Apellyasiya Məhkəməsi onu həbsdən buraxmaqdan imtina edib.
Lakin cəzasını 6 ay azaldaraq, 5 ilə endirib.
