“Türk Dövlətləri Təşkilatına üzv və müşahidəçi ölkələr olaraq cinayətkarlığa və cinayətkar qruplara, xüsusilə də transsərhəd cinayətlərə qarşı qətiyyətli mübarizəmizi davam etdirəcəyik”.
1xeber.media Teleqraf-a istinadən xəbər verir ki, bunu Türkiyə daxili işlər naziri Ali Yerlikaya sosial media hesabında yazıb.
Yerlikaya dünən Azərbaycanın ev sahibliyi ilə Qazaxıstan, Qırğızıstan, Özbəkistan və müşahidəçi ölkələr Şimali Kipr Türk Cümhuriyyəti və Macarıstanın iştirakı ilə Türk Dövlətləri Təşkilatına üzv ölkələrin daxili işlər nazirlərinin 2-ci toplantısını keçirdiklərini bildirib.
Toplantının əsas gündəminin terror, narkotiklər, kibercinayətkarlıq və qeyri-qanuni miqrasiyaya qarşı mübarizə, daxili işlər xidmətlərinin rəqəmsallaşdırılması və Türk Dövlətləri Təşkilatının Cinayətkarlıqla Mübarizə Şurasının yaradılması olduğunu bildirən nazir qeyd edib:
“Türk Dövlətləri Təşkilatına üzv və müşahidəçi ölkələr olaraq cinayətkarlığa və cinayətkar qruplara, xüsusilə də transsərhəd cinayətlərə qarşı qətiyyətli mübarizəmizi davam etdirəcəyik. Azərbaycan daxili işlər naziri cənab Vilayət Eyvazova göstərdiyi qonaqpərvərliyə görə təşəkkürümü bildirirəm”.
