Azərbaycan və İran arasında diplomatik münasibətlərdə yeni mərhələ başlanır. İran Prezidenti Məsud Pezeşkianın Azərbaycana səfəri çərçivəsində əldə olunan razılaşmaların reallaşdırılması artıq icra strukturlarının gündəliyinə daxil edilib.
İranın "İRNA" dövlət informasiya agentliyinin yaydığı məlumata görə, bu barədə İran Prezidentinin siyasi müşaviri Mehdi Sənayi Azərbaycanın Prezidentinin köməkçisi Hikmət Hacıyevlə görüşdə bəyan edib. Görüşdə qeyd olunub ki, iki ölkə arasında əlaqələr yüksələn xətt üzrə inkişaf edir və bu kontekstdə quru sərhədlərin açılması perspektivindən də danışmaq mümkündür.
İran və Azərbaycan arasında münasibətlərdə müşahidə olunan yumşalma fonunda iki ölkə arasında quru sərhədlərin yenidən açılması məsələsi də gündəmə gəlib. İran tərəfi qarşılıqlı təmasların intensivləşdiyini bildirərək, sərhəd rejiminin də yaxın gələcəkdə dəyişə biləcəyinə ümid etdiyini açıqlayıb.
Məsələ ilə bağlı iqtisadçı Natiq Cəfərli News24.az-a bildirib ki, Azərbaycanın təkcə bir ölkə ilə sərhədi açması hazırkı şəraitdə real görünmür:
“Azərbaycanın ayrı-ayrılıqda hansısa bir ölkə ilə quru sərhədlərini açması hazırda real deyil. Çünki bu addım digər qonşu ölkələr tərəfindən sualla qarşılanacaq. Məsələn, Gürcüstan uzun müddətdir Azərbaycanla quru sərhədin açılması üçün müraciətlər edir, rəsmi xahişlər ünvanlayır. Ancaq bu məsələdə hələlik bir irəliləyiş yoxdur.”
İqtisadçı qeyd edir ki, quru sərhədlərin bağlı qalması artıq həm sosial, həm iqtisadi, həm də turizm baxımından ciddi çətinliklər yaradır:
“Quru sərhədlərin bağlı qalması turizmin inkişafına, regionlararası əməkdaşlığa və ən əsası, vətəndaşların sərbəst gediş-gəlişinə mənfi təsir göstərir. Azərbaycanda turizm potensialı böyükdür və bu sahənin inkişafı üçün sərhədlərin açılması olduqca vacibdir. Eyni zamanda, insanlar ailə üzvlərini ziyarət edə bilmir, tranzit və ticarət imkanları məhdudlaşır. Bu məsələnin tezliklə həll olunması lazımdır.”
Natiq Cəfərlinin fikrincə, Azərbaycan dünyada quru sərhədləri hələ də bağlı saxlayan azsaylı ölkələrdən biridir və bu durum ictimai müzakirələrə səbəb olur. Onun sözlərinə görə, mövcud vəziyyət pandemiya ilə izah olunsa da, artıq pandemiya dövrü geridə qalıb və normallaşma prosesi başa çatmalıdır.
