Mayın 28-də Laçında Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan və Pakistanın Baş naziri Şahbaz Şərifin iştirakı ilə keçirilən üçtərəfli Zirvə görüşü beynəlxalq ictimaiyyətin, xüsusilə də Hindistan mediasının diqqət mərkəzində olub.
Bu ölkənin nüfuzlu “india.com” portalında dərc edilən məqalədə regiondakı strateji dəyişikliklər və yeni ittifaqlar mövzusunun geniş təhlili maraqla qarşılanıb. Məqalədə vurğulanır ki, hazırda Hindistan, İran və Ermənistan arasında əməkdaşlığın dərinləşməsi üçün əlverişli şərait yaranıb. Xüsusilə, Hindistanın Zəngəzur dəhlizi məsələsində Ermənistanı açıq şəkildə dəstəkləməsi Azərbaycanın Avropaya qurudan çıxışını məhdudlaşdırmaq və Türkiyə-Azərbaycan-Pakistan üçbucağına zərbə vurmaq məqsədi daşıya bilər. Bu kontekst, Cənubi Qafqazda yeni geosiyasi oyunların formalaşması kimi dəyərləndirilir.
Hindistanın Ermənistanla yaxınlaşması və Zəngəzur dəhlizinə qarşı sərt mövqeyi regional güc balansına necə təsir edə bilər?
Globalinfo.az-a danışan siyasi şərhçi Əhəd Məmmədli deyib ki, ümumilikdə, Hindistanın Cənubi Qafqaz regionuna təsir imkanları çox məhduddur:
“Hindistan müstəqil dövlət kimi tarixən gənc sayılır. Bu ölkə milli birliyini, dövlət suverenliyini İkinci Dünya müharibəsindən sonra əldə edib. Keçmişə nəzərə saldıqda görürük ki, müxtəlif feodal dövlətlərin və imperiyaların müstəmləkəsi olub.
Hindistanın müasir siyasi-sosial strukturunun formalaşmasında ABŞ, İsrail və digər Qərb ölkələri mühüm rol oynayıblar. Dehli hökuməti bu gün İrəvan, Təl-Əviv və Vaşinqtonla yaxın əməkdaşlıq əlaqələri yaradır. Ermənistan və İsrail kimi ölkələrlə regional baxımdan bir növ qarşılıqlı strateji müttəfiqlik sistemi formalaşdırır. Bu sistemdə Cənubi Qafqazda Ermənistan, Yaxın Şərqdə İsrail, Cənubi Asiyada isə Hindistan mərkəzi yerlərdən birini tutur. Sözügedən ittifaq planlı və məqsədyönlü şəkildə qurulub.
Bütün bu əlaqələrə baxmayaraq, Hindistanın regiona təsir gücü hələlik zəifdir. Doğrudur, Ermənistanla əməkdaşlığı var, amma Türkiyə-Azərbaycan-Pakistan üçlüyünün regional təsiri daha güclüder və effektiv işləyir”.
