Üç ölkədə – Tailand, Çin və Sinqapurda COVID-19-a yoluxma halları kəskin artıb. Hökumətlər vətəndaşları maska taxmağa çağırır.
Bu, Azərbaycanda narahatlığa səbəb olub. Vətəndaşlar bizdə də xəstəliyin artacağını düşünür. Koronavirusa yoluxma sayı arta və qadağalar geri qayıda bilərmi?
Globalinfo.az-a danışan tibb elmləri doktoru, professor Adil Qeybulla deyib ki, əgər epidemioloji vəziyyət pisləşərsə, COVID-19-la bağlı yenidən karantin qaydalarının həyata keçirilməsi zərurəti yaranacaq.
Onun sözlərinə görə, bütün bunlar yenidən qaynaqlanmasına səbəb vaksinasiyanın yetərincə aparılmamasıdır:
“Düzdür, vaksinasiya ilə bağlı müxtəlif söz-söhbətlər dolaşır, amma bu fikirlər əsassızdır. Əsas məsələ odur ki, infeksiya zəncirini məhz vaksinasiya qırdı və qlobal pandemiya sona çatdı. Lakin epidemik ocaqlar hələ də davam edir, çünki hamı vaksinasiya olunmayıb. Elə Azərbaycanın özündə də xeyli insanlar vaksinasiya olunmayıblar. Bütün bunlar yoluxma mənbəyidir”.
Adil Qeybulla deyib ki, bu gün COVID-dən ölüm halları da var, yoluxmalar da kifayət qədər çoxdur:
“Sadəcə, insanlar mövcud xəstəliyə alışıb və prosesə saymazyana yanaşırlar. Bu, əlbəttə, çox pisdir. Dünya Səhiyyə Təşkilatının tövsiyələrinə, xəbərdarlıqlarına ciddi yanaşmaq lazımdır. Təəssüf ki, insanların laqeyidliyi Azərbaycanda deyil, bütün ölkələrdə mövcuddur. Buna görə də maarifləndirmə işlərini gücləndirmək mütləqdir. İnsanları başa salmaq lazımdır ki, pandemiya xeyli insan tələfatına səbəb oldu. Onun yeni bir forması alovlanarsa, hansısa başqa formaya keçərsə, əlbəttə, ölkədə yeni sürprizlər yarana bilər. Hər halda, bunlar nəzərə alınmalıdır”.
