“Ukraynanın xüsusi xidmət orqanlarının ABŞ-ın Mərkəzi Kəşfiyyat İdarəsi (CIA) və Böyük Britaniyanın MI6 kəşfiyyat qurumu ilə birgə hazırladığı kütləvi dron hücumunun bir neçə əsas məqsədi olub”.
1xeber.media xəbər verir ki bu sözləri Tribunainfo.az-a açıqlamasında politoloq Elşən Manafov bildirib.
Politoloqun sözlərinə görə, əvvəla, bu hücumlar Rusiyanın Vitebsk şəhərində yerləşən strateji qırıcı təyyarələrə qarşı təşkil olunub. Rusiya Müdafiə Nazirliyi hücumu təsdiqləyib. Qərb mənbələri 40, Rusiya isə 4 qırıcının məhv edildiyini bildirir. Əgər Qərbin məlumatları doğrudursa, bu, Rusiya hərbi aviasiyasına indiyədək vurulmuş ən böyük zərbə ola bilər. Hücumdan sonra Prezident Vladimir Putin bu açıqlamanı verib:
“Ukrayna öz ölüm əmrini imzaladı, çünki bütün qırmızı xətləri keçdi.”
Qərbin Təxribat Ssenarisi və Nüvə Riski
Anglo-sakson dairələri bu hücumu təşkil etməklə Rusiyanı təxribata sürükləmək niyyətindədirlər. Belə ki, Rusiyanın qüvvədə olan nüvə doktrinasına əsasən, əgər ölkənin strateji nüvə obyektlərinə zərbə endirilərsə, Rusiya özünü müdafiə etmək üçün cavab tədbirləri görmək hüququna malikdir.
Prezident Putin soyuqqanlı qərarları ilə tanınır və adətən emosional əsaslı addımlar atmır. Lakin Qərb ekspertləri düşünür ki, Putin bu dəfə nüvə silahı sayılmayan, lakin onun qədər dağıdıcı gücə malik yüksək dəqiqlikli raketlərlə cavab verə bilər. Bu isə Qərbə həmin raketlərə dair kəşfiyyat məlumatları toplamaq və müdafiə sistemlərini test etmək imkanı verə bilər.
Qlobalist Planlar və Danışıqların Manipulyasiyası
Digər tərəfdən, dron hücumları qlobalist dairələr tərəfindən siyasi məqsədlərlə də istifadə edilə bilər. Məsələn, Rusiya bu hücumu əsas gətirərək İstanbul danışıqlarından imtina edə bilər. Bu isə Qərbə növbəti dəfə “Rusiya sivil dünya üçün böyük təhlükədir, onunla yalnız güc dili ilə danışmaq olar” mesajını beynəlxalq ictimaiyyətə ötürmək imkanı yaradar.
Lakin ehtimal olunur ki, Rusiya gözlənilənin əksinə olaraq İstanbul danışıqlarına qatılacaq. Bu dəfə Moskva daha sərt tələblərlə çıxış edəcək. Tələblər arasında:
Krımın Rusiya ərazisi kimi tanınması,
Rusiya nəzarətində olan 4 vilayətdən Ukrayna qoşunlarının çıxarılması,
Ukraynada legitim hakimiyyətin formalaşdırılması və yalnız həmin hakimiyyətlə sülh danışıqlarının aparılması, Ukraynanın neytral statusunun rəsmiləşdirilməsi və NATO-ya qoşulmayacağına dair zəmanət verilməsi kimi məsələlər yer alacaq.
