Sosial şəbəkələrdə yayılan son iddialar cəmiyyətin ciddi narahatlığına səbəb olub. “Təhsildə Nəzarət” səhifəsinin paylaşdığı məlumata görə, Göygöl Peşə Məktəbinin direktoru Kəmalə Nəhmədova və baş mühasib Səadət Abbasova təhsil müəssisəsini biznes mənbəyinə çeviriblər.
1xeber.media xəbər verir ki iddialara görə, məktəbdə vakant yerlər gizlədilərək qanunsuz yollarla müəllimlər işə götürülür, hətta peşə məktəbinə bərbər müəllimi kimi kənar şəxslər təyin edilir. Həmin şəxslər arasında qanunsuz hərbi rəhbər də yer alır. Bu faktlar Maliyyə Nazirliyi tərəfindən araşdırılıb və nəticədə saxta diplom satışı, külli miqdarda yeyinti faktları aşkara çıxarılıb. Məlumatlara əsasən, məsələ artıq Göygöl Rayon Prokurorluğuna göndərilib və cinayət işi açılıb.
Bundan əlavə, müəssisədə çalışan anbardar Kərim adlı şəxsin vasitəsilə tələbələrin mobil telefonları əllərindən alınaraq direktor otağına çağırıldıqları, onlardan müxtəlif adlarla pul yığılaraq “cəzanı özünüz düzəldin, cərimələri ödəyək” tipli ifadələrlə təzyiq göstərildiyi bildirilir.
Bütün bu iddialar təhsildə şəffaflıq və dürüstlük prinsipinə zidd olaraq, ciddi hüquqi qiymətləndirmə tələb edir. İctimaiyyət məsələ ilə bağlı rəsmi qurumların operativ araşdırma aparmasını və günahkarların qanun qarşısında cavab verməsini gözləyir.
Həmçinin qeyd edək ki, Peşə Təhsili üzrə Dövlət Agentliyinin direktor müavini, direktor səlahiyyətlərini müvəqqəti icra edən Ceyhun Kərəmov müvafiq əmr imzalayıb. Əmrə əsasən, Kəmalə Nəhmədova Göygöl Peşə Məktəbinin direktoru təyin edilib.Bakunews.az
