İnsan övladı (əgər əsl insandırsa) haqq-ədalət, hüquq, günahsız insanların ölümü, və s. məsələlərə çox həssas yanaşır, daxilində ciddi müzakirə, hətta, mücadilə edir, bütün bunları anlayıram, adamı insan edən haldır. Amma, indi dünya elə bir qan çanağına, elə bir xaosa daxil olub ki, bəzən insanlığı önə çıxartmağa tərəddüd edib, məsələlərə sırf maraqlarla, dövlətin, xalqın maraqları ilə baxmağa məcbur olursan.
1xeber.media Bakupost.az-a istinadla xəbər verir ki, bunu ReAL Partiyasının sədri Natiq Cəfərli qeyd edib.
O bildirib ki, Rusiyanın Ukraynaya təcavüzünə münasibət necədirsə, başqa ölkələrdə baş verən kənar müdaxilələrə də eyni olmalıdır:
"Yəni, olmalıdır, amma olmur, çünki Dünya çivisindən çıxıb, yeni "Podstamsız" da qayıtmayacaq öz orbitinə.
Əslində, çox qəliz düşüncələrə qərq olduğum, amma sadə suallar var, məsələn:
1) İranın nüvə silahına sahib olması Azərbaycan və Türkiyə maraqlarına uyğundurmu?
2) Yaxşı, İranın bu silaha sahib olmaması üçün başqa bir dövlət hüquqa zidd, amma sənin və əbədi müttəfiqinin maraqlarına uyğun davranırsa, buna münasibətin necə olmalıdır?
3) Suriyada İranın, Rusiyanın zəifləməsi Azərbaycan və Türkiyənin maraqlarına uyğun idimi? Yaxşı, bu zəiflədilmə prosesində İsrail də önəmli rol oynadısa, bizim bu ölkəyə münasibətimiz necə olmalıdır?
4) İranda xalqa qarşı repressiyalar var idimi, bu basqı illərlə davam edirdimi? Əgər indiki əməliyyat tam qanunsuz da olsa, bu basqının zəifləməsinə səbəb olacaqsa, buna münasibətimiz necə olmalıdır?
5) Azərbaycan müstəqil olandan bəri İran bizim müstəqilliyi həzm edə bilmirdisə, 1991-2020-ci illər arası torpaqlarımızı işğal edən Ermənistana açıq-gizli, böyük-kiçik – fərqi yoxdur, yardım edirdisə və bu yardımı beynəlxalq hüququ, ədaləti çeynəyərək həyata keçirirdisə, bizim İrana qarşı indi hüquqsuz, beynəlxaql hüquqa zidd aparılan əməliyyata münasibətimiz necə olmalıdır?
6) 44 günlük şanlı Vətən müharibəsində İsrail az-çox, fərqi yoxdur, kömək edibsə, amma, İran hətta o günlərdə belə düşmənimizə yanacaq, digər yardən göndərirdisə, buna cəhdlər edirdisə, bizim mövqeyimiz necə olmalıdır?
Sualları artıra bilərdim, amma, düşünürəm ki, məntiqi anladız, ona görə də, yanı-başımızda baş verən və verəcək hadisələrə (əgər təsir imkanlarımız məhduddursa) ancaq və ancaq Dövlət və Xalq maraqlarından, Azərbaycana və Türkiyəyə nə sərf edirsə, o prizmadan baxmağın doğru olduğuna inanıram. Çünki, bəşər İNSANI kimi bu suallara fərqli cavablarım var, amma Azərbaycan VƏTƏNDAŞI olaraq tam aydın dərk etdiyim cavablar mövcuddur...", - o, əlavə edib.
