1xeber.media xəbər verir ki, Yekun mətbuat konfransında NATO-nun baş katibi Mark Rutte Donald Trampla bağlı çoxsaylı suallardan yayınmalı olub, ona görə də Ukraynanı dəstəkləməkdən böyük məmnuniyyətlə danışıb.
Müttəfiqlərin bu il Ukraynaya göstərməyə hazır olacağı yardımın miqdarına cavab verən Rutte heç bir proqnoz verə bilməyəcəyini, lakin bu məbləğin keçənilki yardımı keçəcəyini ehtimal etdiyini bildirib.
ABŞ Ukraynanın ən böyük donoru olaraq qalır, lakin Kiel Universitetinin məlumatlarına görə, Avropa ümumilikdə ABŞ-dan daha çox pul xərcləyib. Bura Avropa İttifaqından birbaşa ödənişlər və Avropa ölkələrindən ikitərəfli yardımlar daxildir.
İnstitutun hesablamalarına görə, 2022-ci il yanvarın 24-dən 2024-cü ilin sonuna kimi Avropa bütövlükdə Ukraynaya 138,7 milyard dollar göndərib. Eyni dövrdə ABŞ 119,7 milyard dollar ayırıb.
Rutte özü bildirib ki, keçən il NATO ölkələri Ukraynaya təhlükəsizlik üçün 50 milyard avrodan çox yardım edib və bu məbləğin demək olar ki, 60%-i Avropa və Kanadadan gəlib.
"Və əlbəttə ki, burada etdiyimiz hər şey Ukraynanın döyüşə davam edə bilməsini, onun mümkün qədər güclü olması üçün lazım olan hər şeyə sahib olmasını təmin etmək məqsədi daşıyır. Amma açıq-aydın, biz hamımız həm də sülh sazişi və ya uzunmüddətli atəşkəs üzərində işləyirik. Və belə olan halda, biz əmin olmalıyıq ki, Ukraynada lazım olan hər şey var ki, Vladimir Putin gələcəkdə bunu bir daha etməyə çalışmasın", - Rut bildirib.
