Rusiya Avropa İttifaqının (Aİ) yeni 18-ci sanksiyalar paketinə cavab olaraq əks tədbirlərin görülməsini istisna etmir.
1xeber.media xəbər verir ki, bunu Rusiya xarici işlər nazirinin müavini Aleksandr Qruşko deyib.
"Lazım gələrsə, biz öz maraqlarımızı təmin edəcək tədbirlər görəcəyik. Həmçinin bəzi əks tədbirlər də mümkündür", - nazir müavini qeyd edib.
Qruşko əmin edib ki, Rusiya tərəfi yeni məhdudiyyətlər paketinin onun iqtisadiyyatına təsirini təhlil edəcək.
Daha əvvəl Rusiya prezidentinin mətbuat katibi Dmitri Peskov bildirib ki, yeni sanksiyalar Avropanın ardıcıl anti-Rusiya xəttini göstərir.
İyulun 18-də Aİ ölkələrinin daimi nümayəndələri Rusiyaya qarşı sanksiyaların 18-ci paketi ilə bağlı razılığa gəliblər. Aİ-nin Xarici İşlər və Təhlükəsizlik Siyasəti üzrə Ali Nümayəndəsi Kaja Kallas məhdudlaşdırıcı tədbirlər siyahısına “Şimal axını” və “Şimal axını 2” qaz kəmərlərinə qarşı məhdudiyyətlərin, habelə Rusiya neftinə yeni qiymət tavanının tətbiqinin daxil olduğunu bildirib.