Almaniya kansleri Fridrix Merz Slovakiyanın baş naziri Robert Fikoya Aİ-nin Rusiyaya qarşı yeni sanksiyalar paketini dəstəkləməyə razı olduğu üçün təşəkkür edib.
1xeber.media xəbər verir ki, O, bu barədə Tagesschau kanalının yayımladığı mətbuat konfransında bildirib.
"Robert Fikoya dünən 18-ci sanksiya paketinin yolunu açmağa razı olduğu üçün minnətdaram. Amma yenə də deyirəm, bu, çox uzun çəkdi", - o deyib.
Merz bildirib ki, son günlər Fiko ilə demək olar ki, hər gün telefonla danışıb, həmçinin Slovakiyanın baş nazirini sanksiyalarla bağlı mövqeyini yumşaltmağa inandırmaq üçün Brüsseldə onunla görüş keçirib.
Bundan əvvəl Fiko bildirmişdi ki, Slovakiya yeni anti-Rusiya sanksiyalar paketinin qəbuluna mane olmayacaq. O, Avropa Komissiyasının sədri Ursula fon der Leyen ilə enerji qiymətləri məsələsində Slovakiya üçün təminatlarla bağlı razılığa gəldiyini izah edib.
Tezliklə Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi Kaja Kallas Aİ ölkələrinin Rusiyaya qarşı 18-ci sanksiyalar paketi ilə bağlı razılığa gəldiyini açıqlayıb.
