“Mixail Solomonoviç uzun illər Rusiya-Azərbaycan münasibətlərinin möhkəmlənməsinə şərəflə xidmət edib və artıq layiqli istirahətə haqqı çatır. O, hər iki ölkədə böyük hörmətə malikdir. Artıq gənc deyil, sadəcə onun çalışmaq dövrü başa çatıb. İndi kitab yazmaq, təcrübəsini bölüşmək zamanıdır. Əminəm ki, o da bu işlə məşğul olacaq”.
Bu sözləri tanınmış rusiyalı jurnalist və siyasi şərhçi Maksim Şevçenko Bakupost.az--a açıqlamasında Mixail Qusmanın işdən çıxarılmasını şərh edərkən deyib.
O bildirib ki, bu qərarın arxasında hər hansı siyasi motiv yoxdur.
Mixail Qusmanın III Şuşa Qlobal Media Forumunda iştirakı və Prezident İlham Əliyevi təriflədiyinə görə Rusiya tərəfindən cəzalandırıldığı iddiasına da münasibət bildirən Şevçenko bu versiyanı qətiyyətlə təkzib edib:
“Mən əminəm ki, bu belə deyil. Vladimir Putin Mixail Qusmanı uzun illərdir şəxsən tanıyır və onun həm Heydər Əliyevlə, həm də İlham Əliyevlə yaxın münasibətlərindən hər zaman xəbərdar olub. Bu, Mixail Solomonoviçin şəxsi qərarıdır və düşünürəm ki, özü də bununla bağlı geniş açıqlama verəcək. Ortada real əsas yoxkən bu mövzuya siyasi don geyindirməyə ehtiyac yoxdur.”
Maksim Şevçenko Qusmanın fəaliyyətini yüksək qiymətləndirdiyini də vurğulayaraq, onun jurnalistika və ictimai diplomatiya sahəsindəki töhfələrinin danılmaz olduğunu deyib.
