Rusiyada 2030-cu ilə qədər bir sıra peşələrin yoxa çıxması və ya kadr saylarının kəskin şəkildə azalması gözlənilir. Bu peşələr arasında zəng mərkəzinin operatoru, kassir, anbar işçisi, köhnəlmiş avadanlıqların təmiri üzrə mexanik, kənd təsərrüfatı sektorunun mütəxəssisləri, mühasib və jurnalist yer alır. Belə dəyişikliklər, xüsusən texnologiyanın inkişafı və avtomatlaşdırma proseslərinin güclənməsi ilə əlaqələndirilir.
Bu vəziyyət Azərbaycan üçün də keçərlidirmi? 2030-cu ilə qədər ölkəmizdə hansı peşələr yoxa çıxa bilər?
1xeber.media xəbər verir ki,Globalinfo.az-a danışan təhsil eksperti Elşən Qafarov deyib ki, kadr hazırlığı ilə peşə məktəbləri, orta ixtisas təhsil müəssisələri, kolleclər və ali təhsil müəssisələri məşğuldur:
“Hər il NK həm peşə, həm də orta ixtisas təhsil müəssisələri üçün ali təhsil ixtisaslarının təsnifatını təsdiq edir. Əslində bu ixtisaslar üzrə kadr hazırlığı əmək bazarının tələblərinə uyğun şəkildə aparılmalıdır. Əmək bazarını öyrənmək üçün bütün ölkələrdə müəyyən qurumlar fəaliyyət göstərir. Azərbaycan Prezidentinin 2022-ci ildə imzaladığı sərəncamda bu məqsədlə Elmlər Akademiyası nəzdində Elmi Tədqiqat İnstitutu, Əmək və Əhalinin Sosial Müdafiəsi Nazirliyinin nəzdində isə ayrıca bir institut yaradılması təklif edilib. Təəssüf ki, 2025-ci ilin yarısının keçməsinə baxmayaraq, bunlar hələ yaradılmayıb. Əmək bazarının ciddi öyrənilməməsi nəticəsində hansı ixtisasların yoxa çıxacağı və ya hansı yeni ixtisasların yaranacağı barədə dəqiq proqnoz verə bilmirik”.
Ekspert qeyd edib ki, bu dəyişikliklər texnologiyanın inkişafı ilə əlaqələndirilir:
“Azərbaycan üçün də bu hal keçərli ola bilər, çünki avtomatlaşdırma və rəqəmsal texnologiyalar bir çox ənənəvi peşələri sıradan çıxardıqca, yeni sahələr yaranacaq. Müasir dövrün çağırışlarına uyğun olaraq bəzi ixtisaslara, xüsusilə İKT və mühəndislik sahələrinə tələbat artır. Lakin aqrar sahədə çalışan mütəxəssislərə, habelə mühasiblərə olan ehtiyac həm keçmişdə, həm də gələcəkdə davam edəcək. Bununla yanaşı, konkret olaraq hansı peşələrin və ixtisasların əmək bazarından çıxacağı barədə dəqiq rəy vermək çətindir”.
