ABŞ ilə ticarət razılaşması Avropanın zəifliyini açıq şəkildə nümayiş etdirdi.
1xeber.media xəbər verir ki, bunu “Tagesspiegel”ə açıqlamasında Avropa Parlamentinin (AP) vitse-prezidenti Katarina Barley deyib.
"Bu saziş bir irəliləyiş deyil, Avropanın zəifliyinin bariz əlamətidir. Avropa Komissiyası güclü təzyiq altında təslim oldu", - Avropa Parlamentinin deputatı bildirib.
Onun sözlərinə görə, ABŞ ilə razılaşma yalnız Avropa İttifaqı (Aİ) ölkələrinin Vaşinqtondan struktur asılılığını dərinləşdirir və əsas Avropa sənayelərinin vəziyyətini pisləşdirir.
İyulun 27-də ABŞ və Aİ ticarət razılaşması əldə ediblər. Onun şərtlərinə görə, Aİ ABŞ-dan 750 milyard dollara enerji resursları almağa və Amerika iqtisadiyyatına daha 600 milyard dollar investisiya qoymağa borcludur. Eyni zamanda, Avropa mallarına tariflər 15 faiz, Amerika malları üçün isə sıfır olacaq.
Daha əvvəl Almaniya kansleri Fridrix Merz bildirmişdi ki, ABŞ-ın Aİ ilə ticarət müqaviləsi çərçivəsində tətbiq etdiyi tariflər Almaniya iqtisadiyyatı üçün yükdür. O, Almaniya iqtisadiyyatının ABŞ-ın tariflərindən "əhəmiyyətli dərəcədə" zərbə alacağını, lakin indiki 15 faizlik tarif səviyyəsinin "əldə edilə bilən ən yaxşısı" olduğunu söylədi.
