1xeber.media xəbər verir ki,Yevlax rayonu, Ş.Qurbanov küçəsi, ev 88 ünvanında yaşayan Qarabağ müharibəsi qazisi Səfərov Azər Saleh oğlu tərərfindən Hurriyyet.az saytının redaksiyasına şikayət məktubu daxil olub. Şikayətçi saytımız vasitəsilə Prezident İlham Əliyevə, Məhkəmə Hüquq Şurasının sədri İnam Kərimova, Şəki Apellyasiya Məhkəməsinin sədri Nuru Quliyevə müraciət edir:
“Cənab Prezident!
Hörmətli Cənabalar!
Nəzərinizə çatdırmaq istəyirəm ki, 1998-ci ildə Yevlax rayonu, Qoyunbinəsi kəndi ərazisində Dövlət Aqrar İslahat Komissiyasının qərarı ilə bizim adımıza 0.06 ha torpaq sahəsi ayrılmışdır. Keçmiş bələdiyyə sədri Məmmədov Qabil Sultan oğlu qanunsuz olaraq həmin torpaq sahəsindən istifadə etmiş, həmçinin saxta alqı-satqı müqaviləsi əsasında torpağı 2109011780 və 2019014755 qeydiyyat nömrəsi ilə Daşınmaz Əmlakın Dövlət Reyestr Xidmətində xəbərimiz olmadan bizim adımızdan öz adına qeydiyyata aldırmışdır.
Bununla bağlı Yevlax rayon Polis şöbəsində və prokurorluq orqanında araşdırma aparılaraq, saxta yollarla alqı-satqı və digər sənədlərin ekspertizadan gələn cavablarından sonra Qabil Məmmədovun barəsində CM-nin 320.2-ci maddəsi ilə cinayət işi başlamış və sonradan müddətin keçməsi əsası ilə xitam verilmişdir.
Mən etiraz olaraq Yevlax Rayon Məhkəməsinə müraciət etdim. Qarşı tərəf isə Şəki İnzibati Məhkəməsinə bizə məxsus torpaq sahəsinin Dövlət Aktını əsassız olaraq ləğvini qoydu. Şəki İnzibati Məhkəməsinin hakimi Fəxri Hacızadə tərəfindən düzgün araşdırma aparılmadan, haqsız və ədalətsiz olaraq bizim əleyhimizə qərar çıxarılaraq, 30 il bundan əvvəl bizə verilən Dövlət Aktı ləğv edildi. Səbəb kimi isə, guya, Əmək Komitəsində torpaqla bağlı verilən qərarın tapılmamasını əsas gətirmişdir.
Sonradan mən Əmlak Komitəsinin sədrinin qəbulunda oldum, vəziyyəti izah etdim. Mətin müəllimin göstərişindən sonra gizlədilmiş qərarı və digər müvafiq arxiv sənədlərini mənə təqdim etdilər. Bundan sonra yeni açılmış hal kimi mən Şəki İnzibati Məhkəməsinə müraciət etdim. İşimiz yenidən Fəxri Hacızadənin icraatına verildi. Mən də bu hakimin işə ədalətli baxacağına inanmırdım. Təəssüf ki, düşündüyüm kimi də oldu...
Hazırda işimiz Şəki Apeliyasiya Məhkəməsinin hakimi Vüqar Musayevin icraatındadır. Bu illər ərzində mənim və ailə üzvlərimin bütün Konstitusion hüquqları pozulmuşdur. Cənab Prezident bu ili "Konstitusiya ili" elan etdiyi üçün, biz də pozulmuş konstitusion hüquqlarımızın bərpa olmasını rica edirik.
Cənab Prezident!
Hörmətli Cənabalar!
Yuxarıda qeyd etdiklərimi nəzərə alıb, Qarabağ qazisi olaraq xahiş edirəm ki, Şəki Apellyasiya Məhkəməsində bizim bu işimizə ədalətli baxılmasına və dövlət tərəfindən bizə ayrılmış torpaq sahəsinin qaytarılmasına köməklik göstərəsiniz”.
Yazıda adları çəkilən şəxslərin və qurumların mövqeyini dərc etməyə hazırıq.
