Azərbaycan Respublikası hər zaman beynəlxalq hüququn fundamental prinsiplərinə, xüsusilə dövlətlərin suverenliyi və ərazi bütövlüyünün toxunulmazlığı məsələsinə sadiqliyini bəyan edib və bu mövzuda daim prinsipial mövqe nümayiş etdirib. Otuz il işğaldan əziyyət çəkən Azərbaycanın Ukraynanın ərazi bütövlüyünü dəstəkləməsi də məhz bu prinsipial xəttin tərkib hissəsidir.
1xeber.media xəbər verir ki,bu sözləri Modern.az-a açıqlamasında Milli Məclisin Gənclər və idman komitəsinin sədri Şahin İsmayılov deyib.
“Rusiya Dövlət Dumasının deputatı Konstantin Zatulinin əsassız və məntiqdən uzaq açıqlaması reallığı əks etdirməyən, dəyərsiz söz yığınından başqa bir şey deyil”, - deyən Şahin İsmayılov qeyd edib ki, Azərbaycan uzun illərdir balanslaşdırılmış, çoxşaxəli və müstəqil xarici siyasət kursu yürüdür. Azərbaycan Prezidentinin müəyyənləşdirdiyi siyasət ölkəmizin milli maraqlarına xidmət edir.
Komitə sədri qeyd edib ki, heç bir ölkə və ya hər hansı qüvvə Azərbaycana öz iradəsini diqtə edə bilməz. Ölkəmiz bu gün beynəlxalq münasibətlər sistemində güclü aktor kimi mövqelərini möhkəmləndirir. Dünyanın bir nömrəli ölkəsi olan ABŞ Azərbaycana və onun Prezidentinə hörmətini ifadə edir və ölkəmiz ilə strateji əməkdaşlıq əlaqələri qurur. Bu xüsusda, Zatulinin Azərbaycan-ABŞ münasibətlərinə dair qeydinin də heç bir əsası yoxdur.
“Azərbaycan torpaqlarının işğalı dövründə separatçılarla isti münasibəti ilə seçilən Zatulin bu illər ərzində daim özünün iqtisadi maraqları qarşılığında Azərbaycana qarşı böhtan xarakterli çıxışlar edib, Qarabağa olan qeyri-qanuni səfərləri ilə diqqət çəkib”.
Cənab Prezident İlham Əliyevin “Əl-Ərəbiyyə” telekanalına müsahibəsində Rusiya ilə münasibətlərlə bağlı Azərbaycanın mövqeyini açıq şəkildə bəyan etdiyini söyləyən Şahin İsmayılov bildirib ki, Vətən müharibəsinin son günündə Azərbaycan öz sərhədinə yaxınlaşan rus helikopterini təsadüfən vurduğu zaman etdiyi davranışın eynisini də Rusiya tərəfindən gözləyir. Bu, ölkəmizin, xalqımızın haqlı mövqeyidir və tələbidir.
