Son vaxtlar azərbaycanlı tanınmış şəxslərin Rusiyaya buraxılmaması halları artıb. Meyxanaçı Namiq Qaraçuxurlunun Şeremetyevo Beynəlxalq hava Limanının əməkdaşları tərəfindən saxlanılması xəbəri məsələni yenidən aktuallaşdırıb. Bundan öncə deputat Azər Badamov, prodüser Emin Əfəndi və məşqçi Kamil Zeynallı da oxşar vəziyyətlə üzləşib. Qeyd edilən məlumatlar Azırbaycan-Rusiya münasibətlərindəki gərginliyi bir daha gündəmə gətirib.
Rusiyanın azərbaycanlı məşhurlara qarşı bu addımının əsas motivi nə ola bilər? Siyasi təzyiq, yoxsa təhlükəsizlik arqumentləri?
1xeber.media xəbər verir ki,Globalinfo.az-a danışan politoloq Vəli Əlibəyov deyib ki, Moskva-Bakı münasibətləri hazırda gərgin olaraq qalır:
“Tanınmış şəxslərin Rusiyaya buraxılmaması və hava limanlarında saxlanılması da bunun göstəricisidir. Kreml bununla münasibətlərin əvvəlki səviyyədə olmadığını nümayiş etdirir. Paralel olaraq, həmvətənlərimizə qarşı təzyiq vasitəsi kimi belə addımlardan istifadə edir. Məqsəd isə Azərbaycanın öz davranışında müəyyən dəyişikliklərə getməsinə nail olmaqdır”.
Politoloq qeyd edib ki, vəziyyətin bu cür davam etməməsi üçün tərəflər arasında arzuolunmaz münasibətləri yaradan səbəblər aradan qaldırılmalıdır:
“Rusiyanın Azərbaycana məxsus təyyarəni vurması və hadisəyə görə üzr istəməməsi gərginliyə yol açan əsas amillərdəndir. Digəri isə sözügedən ölkədə azərbaycanlılara qarşı baş verən zorakılıqlardır və bunun sonu hələ görünmür. Mövcud vəziyyətdə yaşanan gərginlik Azərbaycandan deyil, Rusiyanın mövqeyindən asılıdır. Moskva bu siyasətini dəyişmədiyi müddətdə münasibətlərin də hazırkı səviyyədə qalacağı gözlənilir”.
