Kirayə mənzil bazarında tələbə axını səbəbindən yaranan qiymət artımı bu il də müşahidə olunur. Lakin vəziyyətə təsir edən əsas amillərdən biri Bakıda aparılan genişmiqyaslı söküntü işləridir. Köhnə binaların sökülməsi kirayə bazarındakı sıxlığı daha da artırır.
1xeber.media xəbər verir ki,bu sözləri Axar.az-a açıqlamasında əmlak eksperti Elnur Fərzəliyev deyib.
Onun sözlərinə görə, köhnə yaşayış binalarının və həyət evlərinin sökülməsi nəticəsində bazarda mənzillərin sayı azalır:
“Son 1-2 ildə paytaxt Bakıda genişmiqyaslı söküntü işləri aparılır. Köhnə yaşayış binalarının və fərdi evlərin sökülməsi həmin ərazilərdə kirayəlik mənzillərin sayının azalmasına, dolayısı ilə bazarda sıxlığa səbəb olub. Bu binaların yerində yeni çoxmənzilli yaşayış kompleksləri inşa olunur, lakin bu yeni binalarda kirayə qiymətləri köhnələrə nisbətən təxminən iki dəfə baha olur. Digər tərəfdən, söküntü səbəbindən evsiz qalan sakinlər də özlərinə yeni mənzillər verilənə qədər kirayə bazarına üz tutur. Nəticədə Bakıda söküntülərin təsiri kirayə bazarına birbaşa yansıyır. Yaxın gələcəkdə tələbə büdcəsinə uyğun mənzil tapmaq daha da çətinləşəcək”.
Ekspert bildirib ki, tələbələr əsasən Yasamal, Nəsimi və Nərimanov rayonlarına üstünlük verirlər. Çünki ali təhsil müəssisələrinin əksəriyyəti bu ərazilərdə yerləşir. Lakin yüksək qiymətlər onları Bakının ətraf yaşayış massivlərinə – Masazır, Zirə, Xırdalan, Saray və digər məntəqələrə üz tutmağa məcbur edir. Bu isə əlavə vaxt itkisinə səbəb olur:
“Şəhər ətrafında yaşayan tələbələr hər gün saatlarla yollarda, ictimai nəqliyyatda vaxt itirirlər. Bu, həm təhsilə, həm də gündəlik həyatlarına mənfi təsir göstərir”.
Elnur Fərzəliyev kirayə bazarında artan dələduzluq halları barədə də xəbərdarlıq edib:
“Çoxlu sayda saxta elanlar mövcuddur. Mənzillər real bazar qiymətindən ucuz göstərilir və tələbələr, eləcə də onların valideynləri aldadılır. Əvvəlcədən ödəniş tələb olunur, pul göndərildikdən sonra isə elan silinir. Ona görə də tələbələr yalnız mənzil sahibi ilə birbaşa müqavilə bağlamalı və heç vaxt əvvəlcədən pul göndərməməlidirlər”.
Ekspert əlavə edib ki, kirayə qiymətlərində artım davam edəcək.
