Aylar öncə Rusiya hava məkanında Azərbaycan Hava Yollarına məxsus təyyarənin vurulması, bu ölkədə yaşayan azərbaycanlılara qarşı cinayət və bu tipli başqa hərəkətlər Azərbaycan-Rusiya münasibətlərinin gərginləşməsinə səbəb olub. Lakin son günlər baş verən bəzi hadisələr diqqət çəkir. Belə ki, bir müddət əvvəl Rusiya-Azərbaycan Baş nazirlərinin birinci müavinləri arasında görüş olub. Baş nazirlərin müavinləri Azərbaycanla Rusiya arasında iqtisadi əməkdaşıq üzrə Hökumətlərarası Komissiyanın 23-cü iclasının Protokolunu imzalayıblar. Ardınca Rusiya və Azərbaycan xarici işlər nazirləri arasında telefon danışığı baş tutub. Daha bir önəmli hadisə isə Rusiya Prezidentinin Azərbaycanın Birinci vitse-prezidenti Mehriban Əliyevaya doğum günü münasibətilə təbrik məktubu ünvanlamasıdır. Putin Birinci vitse-prezidenti təbrik edib və onun vasitəsilə ölkə başçısı İlham Əliyevə salamlarını çatdırıb.
Bütün bunlar iki ölkə arasındakı gərginliyin azalmasına dəlalət edirmi?
1xeber.media xəbər verir ki,Modern.az-a açıqlamasında Milli Məclisin müdafiə, təhlükəsizlik və korrupsiya ilə mübarizə komitəsinin üzvü Hikmət Babaoğlu bildirib ki, son vaxtlar müşahidə edilən Rusiya-Azərbaycan gərginliyində bütün məsuliyyət Rusiya tərəfinin üzərinə düşürdü:
“Çünki nəticə etibarilə münasibətlərin gərginləşməsinə səbəb Rusiyadakı bəzi hərbi, siyasi dairələrin məsuliyyətsiz davranışları, Rusiya hava məkanında Azərbaycan təyyarəsini vurmaları və nəhayət bu ölkədəki bəzi siyasi mərkəzlərin baş vermiş cinayətlə bağlı məsuliyyətdən yayınma cəhdləridir. Azərbaycan isə xeyli müddət davam edən bu prosesdə təmkinini, soyuqqanlılığını itirmədi və öz mövqeyindən bir addımda çəkilməyib, haqlı mövqeyində israr etdi. Azərbaycan Prezidenti cənab İlham Əliyev yerli və xarici media nümayəndələrinə müsahibələrində bir neçə dəfə bu mövzuya toxunaraq ölkəmizin mövqeyini bir daha izah etdi və haqlı olduğumuzu bildirdi. Eyni zamanda, diplomatik dönüş üçün heç vaxt dilplomatik pəncərəni qapatmadı. Azərbaycan iddia etmədi ki, bu qəsdən edilib. Ən son "Əl Ərəbiyyə" telekanalına müsahibəsi zamanı da Prezident təyyarənin səhvən vurulduğunu, amma sonradan cinayətkarcasına təyyarənin izinin itirilməsinə cəhd edildiyini bildirib. Burada artıq cinayət tərkibi var. Mənə elə gəlir ki, haqq və ədalət önündə haqsız mütləq geri çəkilməlidir. Ona görə də biz Rusiyanın iki ölkə arasındakı münasibətləri bundan sonra daha da gərginləşdirməməsini gözləyirdik. Çünki bu hər iki ölkə üçün də yaxşı heç nə vəd etmirdi. Üstəlik də haqsız olaraq Azərbaycana, eləcə də Rusiyada yaşayan azərbaycanlılara qarşı törədilən cinayətlər məsuliyyətsizlik psixologiyasının gətirdiyi davranışlar idi".
Deputat vurğulayıb ki, baş verən son hadisələr iki ölkə arasındakı buzların əriməyə doğru getməyindən xəbər verir:
"Son dövrlərdə bir neçə hadisə baş verdi. Rusiya Federasiyası Baş nazirinin müavini ilə Azərbaycan Baş nazirinin müavini Həştərxanda görüşdülər, bu, artıq buzların əriməyə doğru getdiyini xəbər verdi. Bir qədər sonra Rusiya xarici işlər naziri ilə Azərbaycan xarici işlər naziri arasında danışıqlar baş tutdu. Ən yeni reallıq qiymətləndirildi. Nəhayət, bu səciyyə bir qədər də yuxarı qalxdı. Ən ali səviyyədə Rusiya prezidenti Vladimir Putin Azərbaycanın Birinci vitse-prezidenti Mehriban xanım Əliyevanı təbrik etdi və Azərbaycan Prezidentinə öz salamlarını çatdırmasını xahiş etdi. Mənə elə gəlir ki, bu Azərbaycanın ədalətli mövqeyi və dəyanəti qarşısında Rusiyanın atmalı olduğu addımlar idi ki, atıldı. Nəticə etibarilə, ən ekstermal vəziyyətdə belə Azərbaycan diplomatiyası təmkinini, ədalət hissini, etibarlı tərəfdaşlıq keyfiyyətini itirmir. Məncə, Rusiyada buna bir qədər əmin olmağa başlayıblar və buna görə də belə addımların davamını önümüzdəki günlərdə gözləmək olar".
