Azərbaycan Respublikasının İnzibati Xətalar Məcəlləsinə dəyişiklik təklifi çərçivəsində ilkin hərbi qeydiyyata alınmalı olan vətəndaşların çağırış vərəqəsində göstərilmiş müddətdə üzrlü səbəb olmadan müvafiq icra hakimiyyəti orqanına gəlməməsinə görə cərimənin məbləği 30 manatdan 100 manata çatdırılıb.
Qanuna dəyişiklik artıq bir müddətdir ki, qüvvəyə minib. Cərimənin artırılmasının bu sahədə intizamın təmin edilməsində nə qədər təsirli rol oynadığı maraqlı nüansdır.
1xeber.media xəbər verir ki,Modern.az-a Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Hikmət Babaoğlu bildirib ki, Azərbaycan gənclərinin bu cərimə ilə üzləşəcəyinə şahidlik edilməyəcək:
“İnzibati Xətalar Məcəlləsində nəzərdə tutulan bütün cərimələr məzmunundan göründüyü kimi intizamın, məsuliyyətin artırılması üçündür. Müxtəlif sahələrdə bu cərimələr müəyyən nəticələrə səbəb ola bilər. Ancaq bütün hallarda bunlar ictimai məsuliyyət baxımından vacibdir. Hərbi çağırışla bağlı məsələlərə gəldikdə isə mənə elə gəlir ki, Azərbaycan gənclərində vətənpərvərlik o qədər yüksək səviyyədədir ki, heç bir halda biz hansısa gəncin bu cür cərimələrlə üzləşəcəyinə şahidlik etməyəcəyik”.
Deputat vurğulayıb ki, ictimai münasibətlər baxımından cərimələrin tətbiqinin çox məhdud olacağına şahidlik edəcəyik:
“Əlbəttə, müəyyən istisnalar ola bilər. Amma bütün hallarda Azərbaycan gəncliyinin vətənsevərliyi, cəmiyyət və dövlət qarşısında məsuliyyət hissləri çox yüksək olduğu üçün hər hansı inzibatı cəzanın tətbiqinə ehtiyac yaranmayacaq. Bu qanunvericilik yaradıcılığının tələbi olsa da, bir o qədər də ictimai münasibətlər baxımından onun tətbiqinin çox məhdud olacağına şahidlik edəcəyik”.
Hərbi ekspert İbrahim Rüstəmli isə hazırda ilkin tibbi hərbi qeydiyyatla bağlı proseslərdə Xətai rayonu üzrə iştirak etdiyini və valideynlərin bəzilərinin həddindən çox ciddi problemlər yaratdıqlarını diqqətə çatdırıb:
“Təsəvvür edin ki, valideyndən övladının müəyyən sənədlərini gətirib təqdim etməsini xahiş edirik, o isə "bu mənim maraq dairəmdə deyil" deyir. Onun diqqətinə çatdırırıq ki, bu sizin maraqlarınızda olmasa da, dövlətin maraqları daxilindədir. Buna Səfərbərlik və Hərbi Xidmətə Çağırış üzrə Dövlət Xidməti, Müdafiə Nazirliyi nəzarət edir. Bu uşaqların qeydiyyata götürülməsi ordunun gələcəkdə komplektləşdirilməsi üçün əsas baza rolunu oynayır. Gələcək proqnozları biz qeydiyyata salınmış uşaqların sayı əsasında veririk. Bu çox önəmli dövlət tədbiridir. Bəzi valideynlər bu məsələyə barmaqarası münasibət göstərirlər”.
İ.Rüstəmli qeyd edib ki, cərimələrin tətbiqi bu sahədə müəyyən irəliləyişlərə səbəb olub:
“Əslində, mən cərimələrin əleyhinəyəm. Amma məni də valideynlər incidirlər. Hər kəs öz işini vaxtında görsə, rahat olar. İndi prosesi də bir az təkmilləşdiriblər. Buna baxmayaraq, bəzi valideynlər bilirsiniz adama necə sözlər deyirlər? İzah edirəm ki, onun övladı ilkin tibbi hərbi qeydiyyatdan keçməsə, ağ bilet almayacaq. Ağ bilet almayanda da pasportunu, vəsiqəsini dəyişə, sabah ali məktəbə sənəd verə bilməyəcək. İzah edəndə çətinliklə də olsa, başa sala bilirik”.
Hərbi ekspert cərimələrin birdən-birə fantastik şəkildə qaldırılmasının düzgün olmadığını düşünür:
“Bu gün ağ bileti itirməyə görə cərimə 200 manatdır. Mən cərimələrin fantastik şəkildə artırılmasını məqbul saymıram. Amma cərimələrin təsiri var. Mənim universitetdə bir müəllimim vardı, deyirdi ki, biz üç şeydən-prokuror, polis və puldan qorxuruq. Bütün qanunlarda humanizm prinsipləri əsas götürülməlidir. Cərimə 30 manat idi, bunu 50 manat elə. Məsələn, əvvəllər, ağ bilet itəndə təmannassız yenidən yazıb verirdik, bu kütləvi hal almırdı ki. Fantastik cəhətdən cərimənin 200 manata qaldırılması düzgün deyil”.
