Azərbaycanda helikopterlə qızıl axtarışlarına başlanması sosial mediada ironiya ilə qarşılanıb. Belə ki, hazırda Daşkəsən və Göygöl ərazilərində aeroelektromaqnitik tədqiqatlara start verilib. Əksəriyyət bunu “neft dövrü bitdi, indi göydən qızıl axtarırlar” kimi dəyərləndirir. Bəziləri hesab edir ki, bu, çarəsizliyin göstəricisidir, çünki uzun illər ərzində iqtisadiyyatımız bir mənbəyə, neftə bağlı qalıb. Digərləri də bunu qızılın bahalaşmasından sonra atılan addım kimi qəbul edir.
Bu tədqiqatlar Azərbaycanın mədən sənayesində yeni mərhələnin başlanğıcıdır, ya qlobal qiymət artımına gecikmiş reaksiya? Əhali bu məsələni niyə ironiya ilə qarşılayır?
1xeber.media xəbər verir ki,Globalinfo.az-a danışan sabiq deputat, iqtisadçə Vahid Əhmədov deyib ki, dünyada dövlətlərin iqtisadi gücünü müəyyən edən əsas amillərdən biri qızıl ehtiyatlarıdır:
“Azərbaycanın da kifayət qədər qızıl ehtiyatına malik olması əhəmiyyətlidir. Hazırda Kəlbəcər və Daşkəsən rayonlarında bu istiqamətdə müəyyən işlər görülür. Hər iki bölgədə böyük qızıl yataqları mövcuddur və “AzerGold” QSC bu ehtiyatları aşkarlamaq üçün xüsusi texnika gətirib. Helikopterlər vasitəsilə aparılan axtarış işləri şirkət rəhbərliyinin müsbət addımı kimi qiymətləndirilə bilər. Çünki qızıl ehtiyatı çox olan ölkələr həm hərbi, həm də iqtisadi sahədə daha güclü mövqeyə malik olur. Belə ehtiyatlar lazım gəldikdə iqtisadi sabitliyin qorunmasında mühüm rol oynayır. Məsələn, Rusiya -Ukrayna müharibəsində Kreml öz qızıl ehtiyatından aktiv şəkildə istifadə edir. Azərbaycanda da bu sahənin inkişafı ölkənin iqtisadi möhkəmlənməsinə xidmət edə bilər. Əsas məqsəd isə qızıl gəlirlərinin tək hərbi sahəyə deyil, insanların sosial rifahının yaxşılaşdırılmasına yönəldilməsi olmalıdır”.
V.Əhmədov bildirib ki, Azərbaycanın hələ də kifayət qədər neft və qaz ehtiyatı var:
“Lakin qızıl ehtiyatlarının artırılması da iqtisadi təhlükəsizliyin və dövlət müstəqilliyinin vacib təminatıdır. Fikrimcə, son axtarışlar qiymət artımı ilə əlaqədar gecikmiş reaksiya deyil. Çünki qızıl ehtiyatı faktiki olaraq valyuta ehtiyatı kimi qiymətləndirilir. Ona görə də bu sahəyə diqqətin artırılması milli iqtisadiyyatın dayanıqlığına xidmət edir. Hazırda neft qiymətlərinin yüksək olması Azərbaycanın valyuta ehtiyatlarını qorumağa imkan verir. Düzdür, son zamanlar qiymət artımları daha da sürətlənib. Hökumət bu məsələyə ciddi diqqət yetirməlidir.
Məsələn, Belarus Prezidenti Aleksandr Lukaşenko xüsusi qərar qəbul edərək qiymətlərin əsassız artırılmasını qadağan edib və antiinhisar xidmətinə vəziyyəti ciddi nəzarətdə saxlamaq tapşırığı verib. Ölkəmizdə demək olar ki, hər ay bahalaşma prosesi gedir. Ona görə də qiymət artımının qarşısını almaq və bazar nəzarətini gücləndirmək vacibdir. Əgər yeni qızıl yataqları kəşf olunarsa və mədən sənayesi daha da inkişaf edərsə, bu, ölkənin iqtisadi sabitliyinə, eyni zamanda qiymət siyasətinə müsbət təsir göstərə bilər”.
