“Ramiz Mehdiyevin Rusiyanın adamı olması, Azərbaycanda Rusiyanın maraqlarına uyğun siyasət aparması, kadrların seçilməsində və s. aktiv rol oynadığı hamıya məlumdur. Burada gizli bir şey yoxdur”.
Bu sözləri açıqlamasında Azərbaycan Demokrat Partiyasının (ADP) sədri Sərdar Cəlaloğlu ötən gün Prezident Administrasiyasının sabiq rəhbəri Ramiz Mehdiyevin cinayət məsuliyyətinə cəlb edilməsi ilə bağlı məsələyə münasibət bildirərkən deyib. O bildirib ki, Ramiz Mehdiyev işlədiyi dövrdə özünə yaxın olan məmurlara xüsusi imtiyazlar verib:
“Sual oluna bilər ki, Ramiz Mehdiyev niyə bu günə qədər məsuliyyətə cəlb olunmurdu? Məsələ burasındadır ki, Azərbaycan tarazlaşdırılmış siyasət aparırdı. Avropadan və Amerika Birləşmiş Ştatlarından (ABŞ) kifayət qədər dəstəyi yox idi. Azərbaycan artıq tarazlaşdırılmış siyasətdən imtina edib. Aydın məsələdir ki, birmənalı şəkildə Avropa və ABŞ-yə doğru istiqamət götürüb.
Bir məsələyə diqqət yetirmək lazımdır ki, Ermənistanda da eyni vaxtda müxalifətə aid olan kilsədən dörd keşiş həbs edilib. Hansı ki, orada olan şəxslər Paşinyanı hakimiyyətdən devirmək istəyirlər. Bu da onu göstərir ki, ABŞ-də Azərbaycan və Ermənistan arasında sülhün əldə edilməsindən sonra hər iki dövlətdə baş verən hadisələrdə ABŞ-nin maraqları nəzərə alınır. Mənə elə gəlir ki, ABŞ bu məsələdə “yaşıl işıq” yandırıb ki, Rusiyanın buradakı agentura şəbəkəsinin və adamlarının neytrallaşdırılması Azərbaycan üçün hər hansı ciddi nəticəyə gətirib çıxarmayacaq. Ramiz Mehdiyevin Rusiyanın adamı olması 1990-cı ildən amerikalılara məlum idi”, - deyə o əlavə edib.
Sərdar Cəlaloğlu vurğulayıb ki, parlamentdə, Prezident Administrasiyasında, Ordunun yüksək rütbəli zabitləri və nazirlər arasında Ramiz Mehdiyevin adamları var: “Azərbaycanda bu məsələlər olduqca dərindir. Digər tərəfdən, Düşənbə görüşünü də nəzərə almaq lazımdır. Həmin görüşdən sonra bu addımlar atıldı. Ola bilsin, Rusiya və Azərbaycan münasibətlərin yeni müstəvisinə çıxmaq istəyir.
Eyni zamanda, Putinin həmin görüşdən sonra “Azərbaycan rusdilli ölkədir” deməsi – bu, Azərbaycana qarşı çox ciddi təhdiddir. Daxildə də kifayət qədər qüvvələri var. Tapşırıq veriləcəyi təqdirdə, bir çox hadisələr törədə bilərlər. Mənə elə gəlir ki, iqtidar məhz həmin səbəbdən bu addımı atır ki, Rusiya Azərbaycanın daxilində hər hansı təhlükə yaratmasın və qeyri-qanuni hərəkət etməsin”, - deyə o qeyd edib.
Partiya sədri Azərbaycandakı ruspərəst şəxslərin adlarını açıqlayıb: “Nəcməddin Sadıkov, “Tərtər hadisələri”ndə iştirak edən prokurorlar, hakimlər, yüksək rütbəli zabitlər... Onlar hamısı Rusiyanın adamları ola bilərlər. Bu şəxslərin sayı çoxdur. Təsəvvür edin, həmin adamlar 30 ildir Azərbaycanda fəaliyyətdədirlər.
Bütün bunlar onu deməyə əsas verir ki, həmin şəxslər Rusiyaya bağlı adamlardır. Misal üçün, Allahşükür Paşazadə. O dəfələrlə deyib ki, ölənə qədər Putinə sadiq olacaq. Görünən kəndə nə bələdçi? Allahşükür Paşazadə açıq şəkildə etiraf edir ki, Rusiyanın maraqlarına xidmət edir. Ermənistanın və Gürcüstanın baş keşişləri də Rusiyanın agentləridir. Eləcə də, Rusiyadan orden və medal alan məmur və ictimai şəxslərlə bağlı araşdırma aparılmalıdır. Onların Rusiyanın qarşısında hansı xidmətləri olub, nəyə görə Rusiya onlara orden verib, bunlar hamısı araşdırılmalıdır.
Misal olaraq, Baş nazirin birinci müavini Yaqub Eyyubov niyə “Rusiya torpaqlarının qorunmasında xidmətlərə görə” medal almalıdır? Bu adamın Rusiya torpaqlarına nə aidiyyatı var? O, Azərbaycan Baş nazirinin müavinidir, yoxsa Rusiya Baş nazirinin? Bundan başqa, dəfələrlə Azərbaycan parlamentinin sədri olmuş Oqtay Əsədov Azərbaycandan milyonlarla pulu çıxardı, getdi Rusiyada biznes açdı. Hazırda da Moskvadadır. Deməli, bu şəxs Rusiyanın adamı olub.
Mənə elə gəlir ki, Azərbaycan ABŞ-dən bu məsələlərlə bağlı təhlükəsizlik təminatı alıb, çünki Ramiz Mehdiyev Rusiyanın Azərbaycandakı şəbəkəsinin ideoloji-siyasi rəhbəri idi. Görünür, hökumət Rusiyanın təzyiqlərindən ehtiyat edib və bu günə qədər Ramiz Mehdiyevə toxunmayıb. Bu gün isə artıq imkan yaranıb. ABŞ-dən ciddi təminatlar verilib. ABŞ Prezidenti Donald Trampın o qədər liderlərin içərisində çevrilib İlham Əliyevə salam verməsi, xüsusi qarşılaması və s. bütün bunlar dünyaya onu göstərdi ki, İlham Əliyev hazırda ABŞ-yə daha yaxın olan siyasi liderdir. Artıq Rusiya heç nə edə bilməz. Azərbaycan burada olan rus agentlərinin ifşasını və həbsini təmin etməlidir. Hamı da görməlidir ki, Azərbaycanda bu günə qədər baş verən neqativ hallar bu şəxslərin təzyiqi və əli ilə olub”.
