Aclıq kollektiv uğursuzluqdur və ondan müharibə silahı kimi istifadə etmək cinayətdir.
1xeber.media xəbər verir ki, bu sözləri Roma Katolik Kilsəsinin rəhbəri Papa XIV Leo BMT-nin Ərzaq və Kənd Təsərrüfatı Təşkilatının (FAO) mənzil-qərargahında keçirilən Ümumdünya Qida Günü və təşkilatın 80 illik yubileyi ilə bağlı tədbirdəki çıxışında deyib.
“Münaqişə ssenarilərində qidadan müharibə silahı kimi istifadə olunması qəbuledilməzdir. Biz kədərlə kişiləri, qadınları və uşaqları aclığa məhkum edən bu qəddar strategiyanın davamlı istifadəsinin şahidi oluruq. Belə davam edə bilmərik, bu, aradan qaldırılmalıdır. Beynəlxalq humanitar hüquq istisnasız olaraq mülki şəxslərə və əhalinin yaşaması üçün vacib olan obyektlərə hücumları qadağan edir. Bütün mövcud enerjini həmrəylik ruhunda səfərbər etməliyik ki, dünyada heç kim həm kəmiyyət, həm də keyfiyyət baxımından lazımi qidadan məhrum olmasın. Bu yolla insan ləyaqətini inkar edən, arzuolunan inkişafa xələl gətirən, çox sayda insanı haqsız yerə öz evlərini tərk etməyə məcbur edən və xalqlar arasında anlaşmaya mane olan vəziyyətə son qoya bilərik”, - deyə pontifik bildirib.
Katoliklərin ruhani lideri qeyd edib ki, qida çatışmazlığından əziyyət çəkən, nəticədə xəstəliklər, əqli inkişafında gecikmə olan uşaqlar hökm sürən həssaslığın, ruhsuz iqtisadiyyatın, şübhəli inkişaf modelinin, ədalətsiz və dayanıqsız resurslar bölgüsü sisteminin açıq əlamətidir: “Buna görə də elmin gözlənilən ömrü uzatdığı, texnologiyanın qitələri bir-birinə yaxınlaşdırdığı və biliyin bir vaxtlar ağlasığmaz kimi görünən yeni üfüqlər açdığı bir əsrdə milyonlarla insanın aclıq şəraitində yaşaması və ölməsi kollektiv uğursuzluq, etik anormallıq, tarixi günahdır”.
FAO-nun Romada keçirilən yubiley mərasimində İtaliya Prezidenti Sercio Mattarella və Baş nazir Ciorcia Meloni də iştirak ediblər.
