25 oktyabr Qubadlının azad olunduğu gündür. 44 günlük Vətən müharibəsində ən önəmli döyüşlərdən biri də Qubadlı uğrunda gedən döyüşlər idi. Qubadlı əməliyyatı da xüsusi peşəkarlıq, fədakarlıq tələb edirdi və ordumuzun xeyli sayda strateji yüksəkliyi nəzarətə götürməsi ilə məsələ həllini tapdı. 27 ildən sonra Azərbaycan işğala son qoydu. Noyabrın 9- dək Qubadlı şəhəri və rayonun 41 kəndi azad olundu.
Qubadlı azad olunandan sonra Azərbaycan Ordusunun Laçın istiqamətində yolu açıldı və bir neçə gündən sonra Laçının cənub hissəsində yerləşən kəndlər də azad edildi. Laçın dəhlizinin nəzarətə götürülməsi ilə müharibənin taleyi həll edildi. Ordumuzun Zəfər yürüşü Şuşaya doğru irəliləyirdi.
Məlum olduğu kimi, Qubadlı birinci Qarabağ müharibəsi zamanı – 1993-cü il avqustun 31-də işğal olunmuşdu. İşğal dövründə Ermənistan Qubadlıda da qanunsuz məskunlaşma siyasəti aparırdı, hətta Qubadlıda erməni lobbisinin ianəsi hesabına qanunsuz məskunlaşma üçün qəsəbə də salınmışdı. 44 günlük Vətən müharibəsində əldə olunmuş qələbə nəticəsində bu qanunsuz cinayətlərə də son qoyuldu. Eyni zamanda, 27 oktyabr 2021-ci il tarixində Qubadlı ərazisində Cənub Ərazi Baş Gömrük İdarəsinin “Qubadlı” gömrük postu yaradıldı ki, bu da işğaldan azad edilmiş torpaqlarda gömrük qaydaları əleyhinə hüquqpozmalara qarşı mübarizədə mühüm əhəmiyyətə malikdir.
Son 5 ildir Qubadlının yeni inkişaf tarixi başlanıb. Burada keçmiş məcburi köçkünlərin həyat səviyyəsini yaxşılaşdırmaq məqsədilə müasir standartlara uyğun infrastruktur yaradılır. Prezident İlham Əliyevin Qubadlıya səfərləri zamanı yeni sosial obyektlərin, o cümlədən yeni yaşayış məntəqələrinin təməli qoyulur. Mahruzlu və Zilanlı kəndləri də yenidən qurulur. Hər iki kənddə ümumilikdə 4 minə yaxın insan məskunlaşacaq.
Prezident İlham Əliyevin tapşırığına əsasən, Qarabağ və Şərqi Zəngəzur iqtisadi rayonlarının sosial-iqtisadi inkişafında mühüm rol oynayacaq Qubadlı–Eyvazlı avtomobil yolunun da inşası davam edir. “Yeni Qubadlı–Laçın avtomobil yolunun layihələndirilməsi və tikintisi ilə bağlı tədbirlər haqqında” Prezident Sərəncamına əsasən, yol infrastrukturu müasir standartlara uyğun qurulur.
Şəhərin baş planı ən müasir normalar əsasında hazırlanıb və burada Qubadlının təbiəti, tarixi keçmişi də memarlıqda nəzərə alınıb. Ümumilikdə burada reallaşan infrastruktur layihələri Qubadlının 2050-ci ilə qədərki inkişaf dinamikasını əhatə edir. Əsas məqsəd öz doğma yurduna qayıdacaq soydaşlarımızın rahat, təhlükəsiz yaşayışını təmin etməkdir.
İnqilab Hüseynov,
Sabirabad rayon Yaşıllaşdırma sahəsinin rəisi
