İttiham olunduğu xüsusilə ağır cinayətlərlə bağlı ev dustaqlığında saxlanılan Prezident Administrasiyasının sabiq rəhbəri Ramiz Mehdiyev dövlət hesabına təyin olunmuş vəkildən imtina edib. Ramiz Mehdiyev müdafiəsinin özünün seçdiyi vəkillər tərəfindən qurulmasını istəyir. Bu səbəbdən təyinatlı vəkil Zaur Abiyevin xidmətindən imtina edib.
Akademikin bu qərarı birmənalı qarşılanmayıb və müzakirələrə səbəb olub.
Modern.az-a açıqlamasında Demokratiya və İnsan Hüquqları komitəsinin sədri, Hüquq üzrə fəlsəfə doktoru Çingiz Qənizadə bildirib ki, istintaq prosesində ittiham olunan tərəfin vəkillə təmin olunması məcburidir:
"İttiham olunan şəxsin vəkil tutmaq imkanı yoxdursa, dövlət tərəfindən həmin şəxsə vəkil təyin edilir. Burada şəxsin razılığı nəzərə alınmır. Sonrakı mərhələdə ittiham olunan şəxs istənilən sayda vəkil tuta, vəkillərini dəyişə, dövlət tərəfindən təyin olunan vəkildən imtina edə bilər".
Çingiz Qənizadə qeyd edib ki, dövlətin təyin etdiyi vəkildən imtina və yeni vəkil tutmaq qanunvericiliklə qadağan olunmayan haldır:
"Bir daha qeyd edirəm ki, istənilən təqsirləndirilən şəxs, ittiham olunduğu cinayətin ağırlığından və yüngüllüyündən, onun kateqoriyasından, bir sözlə, nədə ittiham olunmasından asılı olmayaraq, özünə yeni vəkil tuta, vəkilindən imtina edə, onu dəyişdirə bilər. Dövlətin təyin etdiyi vəkildən imtina və yeni vəkil tutmaq qanunvericiliklə qadağan olunmayan haldır. Və hər kəs bu hüququndan istifadə edə bilər. Ramiz Mehdiyev dövlət tərəfindən təyin olunan vəkildən imtina edibsə, deməli, özünə yaxın bildiyi, özü, ailəsi ilə tanış olan adamı, inandığı hüquqşünası özünə vəkil seçmək istəyirr. Qanunvericilik bunu qadağan etmir".
Azad Vətən Partiyasının sədri Akif Nağı isə deyib ki, Ramiz Mehdiyevin bu hərəkəti onun Azərbaycan dövlətçiliyinə olan münasibətini bir daha göstərir:
"Ramiz Mehdiyev Azərbaycan dövləti içərisində millətimizə, dövlətçiliyimizə qarşı fəaliyyət göstərən bir adam olub, bu istiqamətdə əlindən gələni edib, xarici mərkəzlərin, erməni dairələrin sifarişlərini yerinə yetirib. Rusiyanın Azərbaycandakı emissarı olub. Azərbaycan dövləti tərəfindən onunla bağlı normal qaydada ittiham aktı səslənib. "Dövlətə xəyanət" çox ağır ittihamdır. Bu ağır ittihama baxmayaraq, Azərbaycan dövləti, hüquq-mühafizə orqanları, məhkəmə sistemi qanunlara əməl edərək ona vəkil təyin edir. Ən ağır cinayətkarın da ixtiyarı var ki, özünə vəkil tutsun. Amma Azərbaycan dövlətinin təyin etdiyi vəkildən imtina etməsi onun dövlətimizə qarşı növbəti demarşıdır".
A.Nağı vurğulayıb ki, Ramiz Mehdiyevin bu qərarı onun haqq-ədalət məhkəməsindən qaçmaq cəhdidir:
"Sən bu dövlətin içərisində olmusan, dövlətin təyin etdiyi vəkili qəbul etmirsənsə, deməli, bu dövlətin özünü də heç qəbul etməmisən. Eyni zamanda, dövlətin əleyhinə, məhvinə çalışmısan. Ramiz Mehdiyevin dövlətin təyin etdiyi vəkildən imtinası məhz bunun göstəricisidir. Ramiz Mehdiyevin bu addımı haqq-ədalət məhkməsindən qaçmaq cəhdidir. O, köməyi Azərbaycan daxilində, Azərbaycan vəkillərindən yox, kənarda, özünü himayə edənlərin arasında axtarır. Gözləyir ki, müxtəlif yollarla, eləcə də vəkil yollamaqla onu müdafiə edəcəklər. Bunun gözü kənardadır. Ona görə ki, Azərbaycan daxilində həddindən artıq böyük cinayətlər törədib. Bu cinayətlərin altından çıxmaq, onlara bəraət qazandırmaq mümkün deyil. Azərbaycan dövləti Ramiz Mehdiyevin hərəkətləri ilə bağlı öz qərarını verməlidir ki, dövlətimizə qarşı çalışmış adamlar haqq-ədalət məhkəməsində layiq olduqları cəzadan qaça bilməsinlər".
