Hər ilin sentyabr ayının ortalarından açılan ov mövsümü adətən oktyabrın əvvəllərinə qədər davam edirdi. Bu il isə artıq dekabrın 9-u olmasına baxmayaraq, hələ də ov mövsümü açılmayıb. Təkcə onlarla yox, yüzlərlə, bəlkə də minlərlə ovçu bu gecikmədən narahatdır.
Ovçuluğu həm hobbi,həm də istirahət üsulu kimi qəbul edən onlarla şəxs saytımıza müraciət edərək qanunu ov üçün lisenziyalarının olmasına baxmayaraq ov edə bilmədiklərini deyirlər.Səbəb isə səbəbi bilinməyən ov mövsümünün açılmamasıdır.Ovçular isə Ekologiya və Təbii Sərvətlər Nazirliyinə etdikləri müraciətlərə baxmayaraq müsbət cavab ala bilmədiklərini,səbirsizliklə mövsümün açıq elan olunacağını gözləyirlər.
Məsələ ilə bağlı Bioloji Müxtəlifliyin Qorunması Xidmətinin rəisi Firudin Əliyev bildirdi ki, ov mövsümünün nə üçün açılmadığı və nə vaxt icazə veriləcəyi ilə bağlı 2024-2025-ci illər üçün Ov Elmi Koordinasiya Şurasının növbəti iclası keçirilməlidir. Həmin iclasda mövsümün açılıb-açılmayacağı barədə qərar veriləcək. Ancaq həmin iclasın nə vaxt keçiriləcəyi də hələ məlum deyil.
Qısası,ovçulardan səbrli olmağı,nazirlikdən isə məsələni tezliklə həll etməsini xahiş edirik.
