Sabiq səfir Elmira Axundovanın yaxın çevrəsinə daxil olan Elnur İbrahimova mülki iddiaçı Fərman Məmmədova vurduğu xüsusilə külli miqdarda – 513 min 150 manat zərərin ödənilməsi üçün 10 gün vaxt verilib. Əks halda, məhkəmə qərarını qərəzli şəkildə icra etməmək əsası ilə onun yenidən həbs olunması gündəmə gələ bilər.
1xeber.media Musavat.com-a istinadla xəbər verir ki, Elnur İbrahimov yanvarın 16-da Bakı Apellyasiya Məhkəməsində hakim Aqil Musayevin sədrliyi ilə keçirilən prosesdə məhz hökmü icra etmədiyinə, mülki iddia üzrə ödənişdən qəsdən yayındığına görə qandallanmışdı. Elnur İbrahimov 10 günlük inzibati həbsə göndərilmişdi.
Elnur İbrahimov cəmiyyətdə “8 milyonluq dələduzluq işi” kimi tanınan, sabiq səfir Elmira Axundovanın adının hallandığı qalmaqallı cinayət işinin əsas fiqurantlarından biridir. Cinayət işi materiallarında Elmira Axundovanın səs yazıları, həmçinin Elnur İbrahimovun onun evinə günaşırı 5 min manat göndərməsini təsdiqləyən, lakin indiyədək hüquqi qiymət verilməmiş sübutlar mövcuddur.
Bugünkü məhkəmə iclasında hakim Elnur İbrahimovdan vurduğu zərəri niyə ödəmədiyini soruşub. Elnur İbrahimov bunu “imkansızlığı” ilə izah etməyə çalışıb. Lakin hakim iş materiallarında onun Elmira Axundovanın oğlu Həbib Axundova 55 min manat ödədiyini təsdiqləyən sənədin olduğunu xatırladıb. Bu sənəd borclunun real ödəmə qabiliyyətinə malik olduğunu açıq şəkildə ortaya qoyur. Elnur İbrahimov həmin sənədin “formal və şablon” olduğunu iddia edərək, guya nə özü Həbib Axundova 55 min manat verib, nə də Həbib Axundov bu pulu ondan alıb. Beləliklə, vaxtilə Həbib Axundov tərəfindən Bakı Apellyasiya Məhkəməsinə təqdim edilən və onun cəzasının yüngülləşdirilməsinə səbəb olan “ödəmə ərizəsinin” faktiki olaraq yalan üzərində qurulduğu üzə çıxıb.
Hakim icra məmurunun mövqeyinə də sərt iradlar bildirib. Azərbaycan Respublikası adından çıxarılmış hökmün icra edilməməsinin icra məmurunun qeyri-adekvat və qərəzli mövqeyi ilə bağlı olduğunu xüsusi vurğulayıb.
Qeyd edək ki, Elnur İbrahimov 2016-cı ildə Bakı Ağır Cinayətlər Məhkəməsinin hökmü ilə dələduzluqda təqsirli bilinib. Həmin hökmlə onun mülki iddiaçı Fərman Məmmədova 350 min manat ödəməli olduğu da göstərilib və bu ödənişin 5 gün ərzində həyata keçirilməsi tələb olunub.
Reallıq isə fərqlidir: hökmün çıxarılmasından təxminən 10 il keçməsinə baxmayaraq, Elnur İbrahimov bu günədək icradan qərəzli şəkildə yayınıb. Fərman Məmmədov Sabunçşu Rayon Məhkəməsinə müraciət edərək mülki iddia üzrə məbləğin indeksasiyasını xahiş edib. Məhkəmə məbləğin indeksasiyası ilə bağlı iddianı haqlı sayıb və müvafiq ekspertizanın nəticəsinə uyğun olaraq məbləği 513 min 150 manat təsbit edib. Yəni Elnur İbrahimov Fərman Məmmədova 350 min manat deyil, 513 min 150 manat ödəməlidir.
Paradoks ondadır ki, Elnur İbrahimov mülki iddiaçı olan Fərman Məmmədova bir manat belə ödəmədiyi halda, mülki iddiaçı olmayan Həbib Axundova 55 min manat verib. Bu fakt onun həm ödəmə qabiliyyətini, həm də hökmün icrasından məqsədli şəkildə yayındığını açıq göstərir.
Bu arqumentlər Fərman Məmmədov tərəfindən Nəsimi Rayon Məhkəməsinə təqdim edilən rəsmi şikayət ərizəsində əksini tapıb. Lakin məhkəmənin hakimi Elməddin Hüseynov təqdim edilən sənədləri araşdırmayıb, elektron məhkəmə sisteminə yükləməyib, ən əsası isə 55 min manatlıq ödənişi ümumiyyətlə nəzərə almayıb. Qanunun tələbinə baxmayaraq, iş materialları seçmə üsulu ilə formalaşdırılıb, mülki iddiaçının sübutları faktiki olaraq “yoxa çıxıb”. Bakı Apellyasiya Məhkəməsinin hakimi Aqil Musayev sənədləri diqqətlə araşdıraraq Elnur İbrahimovun həbsinə qərar verib.
Bu qalmaqallı işin kökləri 2013-cü ilə gedib çıxır. Elmira Axundova deputat olduğu dövrdə oğlu Həbib Axundovu iş adamı kimi təqdim edib, Dubaydan dəftərxana ləvazimatları gətiriləcəyi adı ilə böyük gəlir vəd olunub. Bu yolla ailəyə yaxın şəxslərdən ümumilikdə 8 milyon manat toplanıb. Lakin “biznes” kağız üzərində qurulmuş sxemdən ibarət olub. Dələduzluq ifşa edildikdən sonra zərərçəkənlər hüquq-mühafizə orqanlarına müraciət edib, Elmira Axundova isə prosesi “pullar qaytarılacaq” vədləri ilə nəzarətdə saxlamağa çalışıb. Sonrakı mərhələdə “günah keçisi” kimi Elnur İbrahimov önə verilib. 2013-cü ilin avqustunda Həbib Axundov Elnur İbrahimovu Qəbələdə “Qafqaz Resort” hotelində Elmira Axundova ilə görüşdürüb. Bir neçə gün sonra Elnur İbrahimov həyat yoldaşı ilə birlikdə qanunsuz şəkildə ölkəni tərk edib, Rusiyada zərərçəkənlərin pulları hesabına yaşayıb. O, yalnız 2016-cı ildə Moskvada saxlanılaraq Azərbaycana gətirilib. Məhkəmə baxışı zamanı Prezident Administrasiyasından hakim Rahib Salmanova Elmira Axundovanın Ramiz Mehdiyevə ünvanladığı, “ağsaqqalım, yalnız sizin oxumağınız üçündür” qeydi ilə göndərilmiş donos-məktubu təqdim olunub. Məktubun PA-da 15244 nömrə ilə qeydiyyata alınaraq hakimə yönləndirilməsi prosesə məhkəmə təzyiqi kimi qiymətləndirilir. Nəticədə vasitəçi kimi təqdim olunan Elnur İbrahimov 9 il azadlıqdan məhrum edilib, zərərçəkənlərdən yalnız Fərman Məmmədovun mülki iddiası qismən təmin olunub. Lakin o, cəza müddətində belə Fərman Məmmədova bir manat ödəməyib. Mülki iddiaçı Fərman Məmmədov vurulmuş ziyanın tam və qeyd-şərtsiz ödənilməsini tələb edir.
