Fövqəladə Hallar Nazirliyinin adı ikinci dəfədir ki, xoşagəlməz hadisədə keçir. Bundan əvvəl “fövqəlnazirlik” əməkdaşlarının xidməti kabinetdə yayılan görüntüləri böyük skandala səbəb oldu və FHN polkovniki həbs olundu.
1xeber.media Tribuna.az -a istinadla xəbər verir ki, bu dəfə isə Çelsi Baxşıyeva adlı bloqer nazirlikdə şöbə müdiri olan Anar Pirməmmədovla olan münasibəti ictimailəşdirməklə yenidən FHN-i gündəmə gətirib. Nazir Kəmaləddin Heydərovun Pirməmmədovu işdən azad etdiyi bildirilsə də, rəsmi məlumat yoxdur.
Hətta onu vəzifədən azad etsə belə, yenə də nazirliyin imicinə növbəti bir zərbə vuruldu. Belə ictimai rəy yaranır ki, nazir Kəmaləddin Heydərov ya kadr seçimində yanılır, ya da idarəetmə düzgün qurulmayıb.
Bəzi mənbələr isə artıq baş verənlər fonunda “fövqəlnazir”in işini itirəcəyini vurğulayır, həmçinin struktur islahatı aparılacağını istisna etmir.
Belə ki, FHN-nin Müdafiə Nazirliyinə birləşdirilməsi təklifi həmişə gündəmdə olub. Lakin Heydərovun təsir gücü və hakimiyyətdəki mövqeyi bu struktur dəyişikliyini hər dəfə ertələyib. İndi isə yeni siyasi elita formalaşır və “köhnə qvardiya”dan qalan tək-tük nazirlərdən biri olan Heydərovla yolların ayrılması, nazirliyin ləğvi və ya, birləşdirilməsi gündəmdədir.
Faktiki olaraq, Heydərov heç bir siyasi və merkantil gücünü saxlaya bilməyib. Bu cür neqativ hadisələrlə hər dəfə gündəmə gəlməsi isə nazirin və nazirliyin reputasiyasına zərər vurur.
