AZAL-a məxsus “Embraer 190” təyyarəsinin Aktau şəhərində qəzaya uğramasından sonra hadisənin səbəbi ilə bağlı müxtəlif versiyalar səsləndirilir. Diqqətçəkən məqam isə təyyarədəki naməlum dəliklərdir. İlkin ehtimal hava gəmisinin quş sürüsü ilə toqquşması olsa da bunu qəlpə zərbəsi ilə əlaqələndirənlər də var. İddia olunur ki, təyyarə vurulub.
Globalinfo.az-a danışan hərbi ekspert Şair Ramaldanov deyib ki, istənilən qəzadan sonra hər hansı versiyalar irəli sürülür:
“Bu təbii haldır. Məsələnin əsas üzü qara qutulardakı məlumatlardan sonra məlum olacaq. Təyyarənin hərəkət marşrutu, hansı istiqamətdə gedib-qayıdacağı və s. onsuz da məlum idi. Bunu hansısa ölkənin hücumu ilə əlaqələndirənlərin də sayı çoxdur. Lakin sağ qalan insanların dindirilməsi, eləcə də rəsmi məlumat verilmədiyi halda dəqiqlikdə səbəbin bu olduğunu demək düzgün olmazdı.
Təyyarədəki naməlum dəliklərin istənilən bir səbəbdən yaranması mümkündür. Çünki uçuş zolağına 100 km qalmış təyyarə eniş edib. Hadisə yerində bütün sahələr üzrə mütəxəssislər, komissiya var. Onların fəaliyyəti, eləcə də qara qutudakı məlumatlar aşkar edildikdən sonra qəzanın səbəbi məlum olacaq.
AZAL həmişə peşəkarlığı ilə seçilib. Orada yüksək təhlükəsizlik tədbirləri görülüb. Pilotlar da olduqca peşəkardır. Quru yolların bağlanmasından sonra əsas yük hava yollarının üzərinə düşüb”.
Hərbi ekspertin sözlərinə görə, yayılan videolardan da görmək olur ki, pilotlar və sitüardessalar çox soyuqqanlılıqla insanları sakitləşdirməyə çalışıblar:
“Bütün prosesləri peşəkarlıqla həyata keçiriblər. Bu böyük qəzada yüksək manevrlə təxminən 29 nəfərin sağ qalması olduqca ciddi məsələdir.
Hətta bəzi insanlar düşünür ki, təyyarə dənizə eniş etməli idi. Təyyarə Qroznıya enməkdən də hava şəraitinə görə imtina edib. Bu halda Xəzərdə hava şəraiti çox güman ki, eniş üçün əlverişli olmayıb. Digər tərəfdən heyətin özü də təhlükə altında idilər və buna rəğmən həm canları, həm də peşəkarlıq baxımından ən optimal varinatı seçiblər”.
