Məlum olduğu kimi.Aktau yaxınlığında qəzaya uğrayan təyyarənin pilotlarından biri Aleksandr Kalyaninov Bakı Avropa Liseyinin məzunu olub.
1xeber.media xəbər verir ki, mərhum pilotun müəllimi Səbinə Bayramova Azedu.az-a danışıb.
S. Bayramova bildirib ki, 5-ci sinifdən 11-ci sinfə qədər Aleksandrın həm müəllimi, həm də sinif rəhbəri olub:
“Aleksandr çox ağıllı, savadlı və dürüst bir şagird idi. Hər zaman hər kəsə kömək etməyə çalışan biri olub. Həmçinin dərslərini yaxşı oxuyurdu. Bundan əlavə, bir neçə xarici dili bilirdi. Millətcə azərbaycanlı olmasa da, Azərbaycan dilində sərbəst danışıq qabiliyyəti var idi. Bu da öz növbəsində Türkiyədə təhsil almağına böyük kömək edib. Həmin universitetdə təhsil aldığı müddətdə də çox böyük uğurlara imza atıb. O bilirdi ki, istədiyi ali məktəbə daxil olmaq çox çətindir, amma buna baxmayaraq hər zaman mübarizə aparırdı”.
O deyib ki, Kalyaninov Türkiyə universitetində o qədər yüksək səviyyədə oxuyurdu ki, hətta İzmir Universitetindən ingilis dilini mükəmməl bildiyi üçün Bakı Avropa Liseyinə təşəkkür məktubu yollanmışdı:
“Onun atası da pilot olub və Aleksandr uşaqlıq vaxtından həmişə arzu edib ki, pilot olsun. O, bu peşəyə bir növ atasından ruhlanıb. Aleksandrın bu cür həlak olması hər birimiz üçün çox ağır oldu. Biz hər birimiz sinif yoldaşları ilə birgə onu çox sevmişik və hər zaman da sevəcəyik.O, elə bir uşaq idi ki, bütün dərs deyən müəllimlər bu xəbəri eşidəndən hətta ağlayırlar. Hazırda sinif müəllimi çox pis vəziyyətdədir”.
