Birləşmiş Ərəb Əmirliklərinin (BƏƏ) “flydubai” aviaşirkəti Rusiyanın 2 şəhərinə uçuşları dayandırıb.
1xeber.media xəbər verir ki, bu barədə Rusiya Tur Operatorları Assosiasiyası (RTA) məlumat yayıb.
"“flydubai” aviaşirkəti fors-major halları və uçuşların təhlükəsizliyinə yaranan təhdidləri əsas gətirərək, 28 dekabr 2024-cü ildən 5 yanvar 2025-ci il tarixinədək Soçi və Mineralnıye Vodı şəhərlərindən Dubaya olan uçuşları müvəqqəti olaraq dayandırıb. Bu qərar 4 mindən çox sərnişinə təsir edir ki, onların 90 faizi tur operatorlarının müştəriləridir.
Hazırda tur operatorları “flydubai” aviaşirkətinin Soçi və Mineralnıye Vodı istiqamətində ləğv etdiyi uçuşlarla bağlı problemi operativ şəkildə həll etməyə çalışırlar", - RTA-nın açıqlamasında bildirilir.
Bundan əlavə, bu gün Qazaxıstanın “QAZAQ AIR” aviaşirkəti də təhlükəsizlik səbəblərinə görə Yekaterinburqa olan uçuşları dayandırıb.
Qeyd edək ki, dekabrın 25-i Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb.
Aktau şəhərində qəzaya uğrayan Bakı-Qroznı reysini yerinə yetirən “Embraer 190” təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub.
Qəzadan sonra xəstəxanaya 27 şəxs daxil olub. Onlardan 15 nəfər Azərbaycan Respublikasının, 8 nəfər Rusiya Federasiyasının, 3 nəfər Qırğızıstan Respublikasının vətəndaşıdır. Bir nəfərin şəxsiyyəti, hələlik müəyyən edilməyib.
Hər iki pilot da daxil olmaqla 3 ekipaj üzvü həlak olub, iki ekipaj üzvü isə sağ qalıb.
26 dekabr tarixində Azərbaycana 14 yaralı və 4 nəfərin cəsədi gətirilib.
Təyyarənin “qara qutu”su artıq aşkar edilib və onun beynəlxalq aviasiya konvensiyalarına uyğun olaraq təhlili üçün prosedurlar aparılır. Hazırda qəzanın səbəbləri araşdırılır. Bütün zəruri tədqiqatlar və məlumatların təhlili başa çatdıqdan sonra yekun nəticələr açıqlanacaq.
