Kiyev meri Vitali Kliçkonun tutduğu vəzifədən azad edilməsinə hazırlıq görülür.
1xeber.media “Gazeta.ru”ya istinadla xəbər verir ki, bu barədə Ukrayna Prezident Ofisinə yaxın mənbələr məlumat yayıb.
Bildirilib ki, Kliçko üçün keçmiş Odessa meri Gennadi Truxanovun vəzifədən uzaqlaşdırılması və vətəndaşlıqdan məhrum edilməsini nəzərdə tutan “Odessa ssenarisi” tətbiq oluna bilər.
Məlumata görə, mer postuna artıq yeni namizədlər də müəyyənləşdirilib. Onların arasında Zaporojye meri vəzifəsini icra edən Regina Xarçenkonun da adı çəkilir. Şəhər rəhbərliyi ətrafında gərginlik Ukrayna Prezidenti Volodimir Zelenskinin Kiyev meriyası və şəxsən Kliçkonu qış mövsümünə hazırlığı iflasa uğratmaqda ittiham etməsindən sonra daha da kəskinləşib.
Kliçko öz növbəsində ittihamları əsassız adlandıraraq, istilik mövsümünün hələ başlamadığını, işıq problemlərinin isə Rusiya raket zərbələri ilə bağlı olduğunu bildirib. O, postunu hərbi administrasiya rəhbərinə təhvil vermək niyyətində olmadığını və növbəti seçkilərə qədər vəzifəsində qalacağını vurğulayıb.
