1xeber.media xəbər verir ki, oktyabrın 27-də İsraildə keçirilən seçkilər Baş nazir Benyamin Netanyahunun hakimiyyətdə qalıb-qalmayacağını müəyyənləşdirəcək mühüm siyasi hadisə kimi qiymətləndirilir.
“Associated Press”, “Reuters”, “The New York Times”, CNN və “Politico” nəşrlərinin təhlillərinə görə, seçkilər ölkənin təhlükəsizlik siyasəti, daxili siyasi gələcəyi və beynəlxalq münasibətləri baxımından əhəmiyyət daşıyır.
Netanyahu 2023-cü il oktyabrın 7-də HƏMAS-ın hücumundan sonra təhlükəsizlik sahəsindəki uğursuzluqlara, Qəzza zolağında və regionun digər ərazilərində davam edən münaqişələrə görə tənqidlərlə üzləşib. Onun rəqibləri baş naziri baş verənlərə görə siyasi məsuliyyət daşımağa çağırırlar.
Netanyahunun korrupsiya ittihamları ilə bağlı davam edən məhkəmə prosesi də seçki kampaniyasının əsas müzakirə mövzularındandır. Baş nazir isə ittihamları rədd edir.
“The New York Times”ın məlumatına görə, Netanyahu seçkilər ərəfəsində İrana qarşı yeni hərbi əməliyyat keçirməyə çalışıb. Lakin İsrail ordusunun Baş Qərargah rəisi Eyal Zamir belə bir addımın mümkün nəticələri ilə bağlı narahatlığını ifadə edib. Nəşrin yazdığına görə, İranla qarşıdurmanın yenidən alovlanmasının səsverməyə təsir göstərə biləcəyi də müzakirə olunub.
CNN və “Politico” isə seçkilərin İsrailin beynəlxalq mövqeyinə, demokratik institutlarının gələcəyinə və Qərb ölkələri ilə münasibətlərinə təsir edə biləcəyini vurğulayırlar.
Netanyahunun tərəfdarları onun HƏMAS, “Hizbullah” və İrana qarşı hərbi əməliyyatlarını təhlükəsizlik sahəsində uğur kimi təqdim edirlər. Müxaliflər isə hökumətin 2023-cü il hücumunun qarşısını ala bilməməsini və hərbi nəticələri diplomatik uğurlara çevirə bilməməsini tənqid edirlər.
