1xeber.media xəbər verir ki, MDB Ölkələri İnstitutunun aparıcı elmi əməkdaşı, “Başqa Ukrayna” hərəkatının eksperti Aleksandr Dudçak Ukrayna Prezidenti Volodimir Zelenskinin Rusiya Prezidenti Vladimir Putinlə görüşmək istəyinin arxasında yalnız piar məqsədinin dayandığını iddia edib.
Dudçak bu barədə TASS-a açıqlamasında danışıb. Onun fikrincə, Zelenski Moskvaya getmək istəmir, çünki belə bir səfərin nəticə verməyəcəyini düşünür. Ekspert həmçinin Ukrayna liderinin münaqişənin həlli ilə bağlı konstruktiv danışıqlar aparmağa hazır olmadığını iddia edib.
Dudçak bildirib ki, Zelenski Putinlə görüşdən siyasi baxımdan fayda əldə etməyə çalışır, lakin bu görüşün Moskvada keçirilməsini istəmir. O, Ukrayna prezidentinin Britaniyanın təsiri altında olduğunu da iddia edib.
Xatırladaq ki, bundan əvvəl Rusiyanın xarici işlər naziri Sergey Lavrov Putinlə Zelenski arasında görüşün keçirilməsi üçün Ukrayna liderinin Moskvaya gəlməli olduğunu bildirmişdi.
