Rusiyaya daxil olan miqrantların statusuna nəzarəti asanlaşdırmaq üçün onların şəxsi və biometrik məlumatlarından ibarət rəqəmsal profil yaradılacaq. Belə ki, iyunun 30-dan etibarən Rusiyaya istənilən buraxılış məntəqəsindən daxil olan xarici vətəndaşlar barmaq izlərini və fotoşəkillərini təqdim etməlidirlər.
Dəyişikliklər Belarus vətəndaşlarına, altı yaşına çatmamış uşaqlara, xarici ölkələrin Rusiyadakı diplomatik nümayəndəlik və konsulluqlarının əməkdaşlarına, habelə onların ailə üzvlərinə, beynəlxalq təşkilatların əməkdaşlarına şamil edilməyəcək.
Bu qərar azərbaycanlıların Rusiyaya gedişinə təsir edə bilərmi?
Politoloq Yusif Bağırzadə deyib ki, Rusiya artıq uzun müddətdir ki, miqrantlarla bağlı siyasətin sərtləşdirilməsi istiqamətində addımlar atır.
Onun sözlərinə görə, hər belə addım təbii olaraq Rusiyaya gedən və orada bu və ya digər şəkildə yaşayan, işləyən Azərbaycan vətəndaşları üçün də təsirsiz ötüşmür:
“Bir neçə gün əvvəl Rusiyanın müvafiq qanunvericiliyinə edilən bir sıra dəyişikliklərə əsasən, 1 yanvar 2025-ci il tarixdən etibarən xarici ölkə vətəndaşlarının Rusiya ərazisində müvəqqəti olma müddəti bir təqvim ili ərzində cəmi 90 günə endirildi. Bunun ardınca iyunun 30-dan etibarən Rusiyaya gedənlərdən həm də barmaq izi tələb edilməsi ilə bağlı qərar qəbul olundu ki, bu da vətəndaşlarımızın gedişinə, eyni zamanda Rusiya ərazisində qalmasına mənfi təsirini göstərəcək. Məlumdur ki, Azərbaycan olaraq biz hər bir xarici siyasət məsələlərində olduğu kimi, müvəqqəti olma və miqrasiya məsələlərində də paritet və qarşılılıq prinsiplərindən çıxış edirik. Rusiyanın qanunvericiliyə müvafiq dəyişikliyindən sonra Azərbaycan da Rusiya vətəndaşlarının ölkəmizdə müvəqqəti qalma müddəti barədə qaydalara dəyişiklik edərək bu müddəti 1 il ərzində 180 gündən 90 günə endirib”.
Politoloq düşünür ki, analoji addım son dəyişikliklərlə bağlı da tətbiq edilməlidir:
“Yəni Rusiya bizim vətəndaşlarımızın ölkəyə girişi zamanı hansısa biometrik məlumatlarından ibarət rəqəmsal profil yaratmağı düşünürsə, bizim də oxşar dəyişiklik etməyimiz yaxşı olardı. Əgər Rusiya özünə strateji müttəfiq adlandırdığı bir ölkə olan Azərbaycanla digər dövlətlər arasında fərq qoymursa, bizim də buna uyğun addımlar atmağımız təbiidir”.
Globalinfo.az
