Bu gün Azərbaycan Kikboksinq Federasiyasında (AKF) qurumun I vitse-prezidenti Ramal Aslanov və məşqçi Elnur Həmidov arasında yaşanan xoşagəlməz insidentlə bağlı iclas keçirilib.
Bu barədə publika.az-a qurumun rəhbəri Orxan Əliyev məlumat verib. O, toplantıda baş vermiş xoşagəlməz hadisə ilə bağlı federasiya tərəfindən qərarlar verildiyini bidirib.
Belə ki, Ramal Aslanov öz ərizəsi ilə tutduğu vəzifədən azad olunub. Eyni zamanda Azərbaycan Kikboksinq Federasiyasının nəzdində fəaliyyət göstərən, Elnur Həmidovun direktoru və baş məşqçisi olduğu "Dragon Fight Academy" idman klubunun lisenziyası ləğv edilib.
Fuad Zeynalovun Azərbaycan Kikboksinq Federasiyasının nəzdində məşqçi fəaliyyətinə xitam verilib.
Elşən Abdulrəhimov isə federasiyanın icraçı direktoru vəzifəsinə təyin olunub.
Qeyd edək ki, DSX mayoru, kikboksinq üzrə Əməkdar məşqçi və Əməkdar idman ustası Fuad Zeynalova hücum etməkdə şübhəli bilinən, məşqçilər Elnur Həmidov, Emil Hümbətov, Elçin Hüseynov, Elvin Məmmədov və Musa Əhmədov saxlanılıblar. Daha sonra kikboksinq üzrə dünya və Avropa çempionu, Azərbaycan Kikboksinq Federasiyasının vitse-prezidenti Ramal Aslanov insidentin sifarişini verən şəxs kimi saxlanılıb.
