Bir zamanlar Suriya qadınının ümumiləşdirilmiş obrazı - gözəl, savadlı, mədəni, ailəcanlı, fəal xanım kimi dünyaya təqdim edilən Əsma Əsədin adının qarşısında son 5-6 ildə sadəcə "diktatorun xanımı" ifadəsi işlədildi. Hazırda həyat yoldaşı Bəşər Əsədlə birlikdə Rusiyada siyasi mühacir həyatı yaşayan Əsma Əsəd həm də xərçəng xəstəliyindən əziyyət çəkir. Onun keçmiş diktatordan boşanmaq istədiyinə dair də məlumatlar dolaşsa da, şayiələr öz təsdiqini tapmayıb. Bu gün isə yayılan məlumatlara inansaq, Əsma Əsəd həm də ingilis agenti imiş...
Böyük Britaniyanın "UK Declassified" saytı Əsma Əsədin ingilis kəşfiyyatına bağlı şəxs olduğuna dair sənədlər dərc edib.
Londonda doğulan Əsma Əsədin 1994-cü ildən İngiltərə kəşfiyyatına xidmət etdiyi və tez-tez MI5 yetkililəri ilə görüşlər keçirdiyi bildirilir.
Yayılan sənədlərdə Əsma Əsədin MI5 məxfi xidmətinin zabiti Eliza Manningham-Buller ilə "Chesterfield Mayfair" otelində görüşdüyü qeyd olunur. Görüşə Bəşər Əsədin də qatıldığı iddia edilir. Həmçinin 1994-cü ildə Əsma Əsədin atası Dr. Favaz Al-Akhrasın Aktondakı evində xüsusi toplantı keçirildiyi və orada Suriya-İsrail münasibətlərinin müzakirə olunduğu qeyd edilir.
Sənədlərə görə, Bəşər Əsəd hələ İngiltərədə təhsil alarkən kəşfiyyat tərədindən izlənilib. Tələbə olarkən o, təhsildən çox siyasi məsələlərlə maraqlanıb. Onun daha çox İsrail-Suriya münasibətləri ilə maraqlandığı bildirilir. Onun bu mövzudakı baxışları ingilis kəşfiyyatının da diqqətini çəkib.
Yayılan məxfi sənədlərdə İngiltərə Milli Kəşfiyyatının dairə rəisi olmuş general Ali Issa Dubanin imzası var.
