Yanvarın 11-də Azərbaycan Serbiyaya “Şahdəniz” yatağındakı problemlərə görə qaz verə bilməyəcəyi ilə bağlı xəbərdarlıq edib.
1xeber.media axar.az a istinadən xəbər verir ki, bu sözləri Serbiya Prezidenti Aleksandr Vuçiç ABŞ dövlət katibinin idarəetmə və resurslar üzrə müavini ilə Riçard Verma görüşündən sonra keçirilən mətbuat konfransında deyib.
“Biz azərbaycanlı qardaşlarımızdan və dostlarımızdan bildiriş aldıq ki, "Şahdəniz" yatağındakı problemlər səbəbindən bu gündən aldığımız gündəlik 1,7 milyon kubmetr qaza arxalana bilmərik. Qaz təchizatının bərpa müddəti isə bəlli deyil. Bu o deməkdir ki, bu gündən biz ehtiyatlarımızı daha güclü və daha çox xərcləməyə başlayacağıq", - Vuçiç bildirib.
O, Azərbaycanın texniki problemi bir-iki aya düzəldəcəyinə ümid etdiyini vurğulayıb.
Vuçiç etiraf edib ki, qışda istehlak daha çox olur və bütün ehtiyatları xərclənməli olacaq, lakin qaz və neft qıtlığının olmayacağına əmindir.
“BP Azərbaycan"dan Trend-in sorğusuna cavab olaraq bildirilib ki, Bolqarıstan və Serbiyaya qazın nəqlinin dayandırılması Şahdəniz Alfa (SDA) platforması ilə Səngəçal terminalı arasında sualtı kondensat ixrac xəttində aşkar edilən texniki nasazlıqla bağlıdır:
“Əməliyyat səbəbi ilə SDA platformasından istehsal və ixrac müvəqqəti olaraq dayandırılıb və platformanın özü təhlükəsiz şəkildə bağlanıb. Platformada şəxsi heyət üçün heç bir təhlükə yoxdur və ətraf mühitə heç bir təsir qeydə alınmayıb. Bütün dəniz obyektləri, o cümlədən SDA platforması və boru kəməri də təhlükəsiz vəziyyətdədir”.
BP qeyd edib ki, hazırda nasazlığın aradan qaldırılması və mümkün qədər tez normal fəaliyyətinin bərpası istiqamətində işlər aparılır.
Bundan əvvəl analoji səbəbdən Azərbaycandan Bolqarıstana təbii qazın nəqli dayandırılmışdı. Bolqarıstanın enerji operatoru "Bulgargaz"ın verdiyi məlumata görə, 7 yanvar 2025-ci il tarixindən etibarən qaz təchizatı texniki səbəblərdən müvəqqəti olaraq dayandırılıb.
“Azərbaycan tədarükçüsündən qaz təchizatının müvəqqəti dayandırılması barədə bildiriş 6 yanvar 2025-ci il tarixində alınıb”, - deyə "Bul
gargaz" bildirib.
