Hesablama Palatasının “Bakı Metropoliteni” QSC-də apardığı audit nəticəsində sərnişindaşımanın maya dəyərinin süni şəkildə artırıldığı üzə çıxıb. Məlumata görə, audit nəticəsində müəyyən edilib ki, sərnişindaşıma fəaliyyəti üzrə subsidiyalar düzgün tənzimlənməyib. Belə ki, yaranan sərbəst vəsaitlər əsaslandırılmadan muzdlu işçilərə fərdi mükafat adı ilə ödənilib. Bu ödənişlər gəlirdən çıxılan xərclərə aid edilərək sərnişindaşıma xidmətlərinin maya dəyərinin artmasına səbəb olub.
“Bakı Metropoliteni” Qapalı Səhmdar Cəmiyyətinin sabiq sədri Zaur Hüseynov buna görə məsuliyyətə cəlb oluna bilərmi?
1xeber.media xəbər verir ki Globalinfo.az-a danışan iqtisadçı Natiq Cəfərli deyib ki, uzun illərdir metropolitendə bu proses baş verir.
İqtisadçının sözlərinə görə, baş verən hal bir tək indiki rəhbərliyin məsuliyyəti deyil:
“Uzun illərdir metropolitendə maya dəyərinin şişirdilməsi, əlavə xərclərin olması kimi proseslər olub və var. Hesablama Palatası isə son bir ili yox, son bir neçə illəri yoxlayıb. Ona görə də əgər məsuliyyətə cəlb olunma məsələsi varsa, bütün bu günə qədər olan metropoliten rəisləri məsuliyyət daşımalıdırlar. O cümlədən də indiki rəhbərlik”.
Globalinfo.az özəl mənbələrdən öyrənib ki, hazırda “Bakı Metropoliteni” QSC-də ciddi islahatlara hazırlıq gedir. Kommunikasiyadan tutmuş, maliyyəyə, idarəetməyə və s. vacib məsələlərə təzədən baxılır. Zəif nöqtələrə, həssas məqamlar araşdırılır, problemlərin kompleks həlli üçün təkliflər hazırlanır. Zaur Hüseynovun rəis olduğu 10 il müddətdə Metropolitendə yol verilmiş mənimsəmənin güman edildiyindən daha çox olduğuna dair iddialar var.
