Naxçıvan Dövlət Universitetinin Sosial Xidmət Mərkəzində 2 Fevral – Gənclər Günü münasibətilə tələbələrlə görüş təşkil edilib.
Universitetin Media və ictimaiyyətlə əlaqələr bölməsindən AZƏRTAC-ın bölgə müxbirinə bildirilib ki, görüşdən öncə universitetin nailiyyət qazanan gənclərinin diplom və kuboklarından ibarət sərgiyə baxış olub.
Naxçıvan Dövlət Universitetinin rektoru Elbrus İsayev tələbə-gənclərin inkişafına göstərilən dövlət qayğısından bəhs edib. Bildirilib ki, Ümummilli Lider Heydər Əliyevin əsasını qoyduğu gənclər siyasəti Prezident İlham Əliyev tərəfindən uğurla davam etdirilir. Bu siyasətin tərkib hissəsi kimi həyata keçirilən "Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı" gənclərin təhsil və karyera imkanlarını genişləndirir. Universitetdə yeni ixtisasların açılması, beynəlxalq proqramların tətbiqi və ingilisdilli orta məktəbin fəaliyyətə başlaması gənclərin qlobal bilik və bacarıqlara yiyələnməsinə şərait yaradır. SABAH qruplarının yaradılması, ikili diplom proqramlarının həyata keçirilməsi, NDU nəzdində İngilisdilli Gimnaziya və Kembric məktəbinin açılması yalnız tələbələr üçün deyil, şagirdlər üçün də beynəlxalq səviyyədə təhsilə çıxış imkanlarını artırır.
Rektor universitet tələbələrinin uğurlarının daim diqqət mərkəzində olduğunu vurğulayaraq, Gənclər Günü münasibətilə fərqlənən 10 tələbəyə Ağbulaq İstirahət Mərkəzində 3 gün istirahət imkanı təqdim olunacağını bildirib.
Tələbə Həmkarlar İttifaqı Komitəsinin sədri Hüseyn İmanov, Tələbə Gənclər Təşkilatının sədri Kamal Nağılı və Tələbə Elmi Cəmiyyətinin sədri Yusif Mirzəzadə çıxışlarında ötən ilin uğurlarla dolu il olduğunu bildirib, tələbələrin il ərzində müxtəlif kateqoriyalarda aktiv fəaliyyətlərinə diqqət çəkiblər.
Sonra universitetin sosial-ictimai həyatında fərqlənən tələbələrə sertifikatlar təqdim edilib.
Çay süfrəsi ətrafında davam edən tədbirdə NDU-nun İncəsənət fakültəsinin Milli vokal ixtisasının III kurs tələbəsi Samir İsmayılovun və Elektrik və elektronika mühəndisliyi I kurs tələbəsi Ədalət Vəliyevin skripkada ifaları dinlənilib.
