Qaxın Ləkit kəndində ailənin beş nəfər üzvü dəm qazından zəhərlənib.
1xeber.media bölgə müxbiri Qax Rayon Mərkəzi Xəstəxanasına istinadən bildirir ki, Ləkit kənd sakini 39 yaşlı Vaqif Süleymanov axşam saatlarında evin işıqlandırılması məqsədilə elektrik generatorundan istifadə edib.
Generator evin alt mərtəbəsində olduğundan ondan ayrılan dəm qazı yaşayış sahəsinə daxil olub. Nəticədə ailə başçısı, onun həyat yoldaşı 35 yaşlı Röyanə Süleymanova və onların üç övladı zəhərlənmə diaqnozu ilə Qax Rayon Mərkəzi Xəstəxanasına yerləşdirilib.
Ailə üzvlərinə ilkin tibbi yardım göstərilib. Həyatı təhlükələri olmadığından onlar evə buraxılıb.
Müvafiq idarələrin əməkdaşları hadisə yerinə baxış keçiriblər. Hadisənin təfərrüatları araşdırılır.
