Aprel döyüşlərindən 9 il ötür. 2016-cı ilin 1-4 aprel tarixlərində gedən döyüşlərdə Ermənistan ordusu üzərində qazanılan qələbə tarixi Zəfərə gedən yolun başlanğıcı oldu. Bu döyüşlər rəşadətli ordumuzun hansı imkanlara, gücə, qüdrətə, döyüş qabiliyyətinə malik olduğunu nümayiş etdirdi. Artıq tarixin arxivinə atılan keçmiş Qarabağ münaqişəsinin həllində daim sülh danışıqlarına önəm verən rəsmi Bakı ən yüksək tribunalardan belə bir bəyanatı da səsləndirdi ki, danışıqlar səmərə verməyəcəyi təqdirdə hərb yolunun seçilməsi şəksizdir. Ermənistanın müxtəlif bəhanələrlə sülh danışıqlarından yayınması, hərbi təxribatlar törədərək diqqəti yayındırmaq cəhdləri 30 illik işğal dövrünün məlum olaylarındandır. Həmin müddətdə bəzi dünya güclərinin ikili standartlara əsaslanan siyasətləri işğalçı dövlətin yeni müharibə planları hazırlamasında, təxribatlar törətməsində mühüm rol oynadı. Azərbaycan dövləti daim bu çağırışı etdi ki, ikili standartların tətbiqi ədalətsizlikdir. Dünya gücləri bu siyasətə son qoymalıdır. Təəssüflər olsun ki, istər 30 illik işğal, istərsə də postmünaqişə dövründə əksər dünya gücləri ikili siyasətdən yaxa qurtara bilmədi. Ölkəmiz heç zaman belə yanaşmalara görə ruhdan düşmədi, əksinə istər döyüş meydanında, istərsə də informasiya cəbhəsində üstünlüyü qazanmaq üçün bütün zəruri addımları atdı. Silahlı Qüvvələrimizin maddi-texniki bazasının möhkəmləndirilməsi, beynəlxalq standartlara uyğunlaşdırılması yönümündə atılan addımların uğurlu nəticələri Aprel döyüşlərində, Günnüt əməliyyatında, uğurlarımızın zirvəsində dayanan tarixi Zəfərimizdə, suverenliyimizin tam bərpa edilməsində özünün aydın ifadəsini tapdı.
Bu fikirləri Trend-ə açıqlamasında Milli Məclisin deputatı Vüqar Rəhimzadə bildirib.
Millət vəkili qeyd edib ki, 2016-cı il aprelin 2-nə keçən gecə erməni silahlı birləşmələri cəbhə xətti boyu bütün mövqelərimizi, eyni zamanda, mülki əhalini atəşə tutdu. Azərbaycan tərəfindən dərhal adekvat tədbirlərin görülməsi ilə bağlı qərar qəbul edilərək düşmənə qəti cavab zərbələri endirildi. Ermənistan ordusunun canlı qüvvəsi və hərbi texnikası məhv edildi. Silahlı Qüvvələrimiz düşməni məğlubiyyətə uğradaraq Füzuli, Cəbrayıl və Ağdərə rayonlarının işğal altındakı ərazilərinin 2 min hektardan çox hissəsini azad etdi. Uğurlu əməliyyatlar nəticəsində Tərtər rayonunun Talış kəndi istiqamətindəki yüksəkliklər işğalçılardan təmizləndi, strateji əhəmiyyətli Cəbrayıl rayonunun Lələtəpə yüksəkliyi azad edildi, minlərlə hektar ərazi Azərbaycan Ordusunun tam nəzarətinə keçdi. Aprel döyüşləri çoxəsrlik tariximizə şanlı qələbə səhifəsini yazdı. Bu qələbə artıq tarixin arxivinə atılmış keçmiş Qarabağ münaqişəsinin tezliklə həllini tapacağına, torpaqlarımızın işğaldan azad edilərək əzəli və əbədi sahibinə qovuşacağına, soydaşlarımızın doğma yurd-yuvalarına qayıdacaqlarına inamı daha da artırdı. Aprel döyüşləri işğalçı dövlətin və ona havadarlıq edənlərin keçmiş Qarabağ münaqişəsinin həllində hərb yolu seçiləcəyi təqdirdə Azərbaycanın məğlubiyyətə uğrayacağı ilə bağlı səsləndirdikləri sərsəm fikirlərin nə qədər əsassız olduğunu bütün dünyaya göstərdi. Dünya Azərbaycan Ordusunun böyük imkanlara malik olmasının şahidinə çevrildi. Dövlət başçısı İlham Əliyev Aprel döyüşlərini belə dəyərləndirmişdir: “Aprel döyüşləri, eyni zamanda, ordumuzun peşəkarlığını göstərmişdir. Ordumuz əlverişsiz mövqelərdən əks-hücum əməliyyatı apararaq strateji mövqelərə sahib oldu. Bu gün bu strateji yüksəkliklər, mövqelər, işğaldan azad edilmiş ərazilər bizə imkan verir ki, təmas xəttində mövcud olan vəziyyətə tam nəzarət edək və istədiyimiz tədbiri görə bilək”.
Vüqar Rəhimzadə vurğulayıb ki, Azərbaycan Ordusu Aprel döyüşlərində bir daha hər bir təxribatın qarşısını qətiyyətlə almağa, düşməni diz çökdürməyə qadir olduğunu sübut etdi. Azərbaycan Ordusu uğurlu Aprel döyüşlərindən ruhlanaraq iki il sonra daha bir böyük Zəfərə imza atdı. 2018-ci ilin mayında Əlahiddə Ümumqoşun Ordu tərəfindən Naxçıvanın Günnüt kəndi və ətraf ərazilərin nəzarət altına alınması bir daha göstərdi ki, Silahlı Qüvvələrimiz qarşıya qoyulan istənilən tapşırığı yerinə yetirməyə qadirdirlər. Doqquz il əvvəl Aprel döyüşləri zamanı Lələtəpədə ucaldılan üçrəngli Bayrağımız indi azad edilmiş bütün torpaqlarımızda - Cəbrayılda, Füzulidə, Zəngilanda, Qubadlıda, Kəlbəcərdə, Ağdamda, Şuşada, Hadrutda, Laçında, Əsgəranda, Xocavənddə, Ağdərədə, Xocalıda və Xankəndidə əzəmətlə dalğalanır. 44 gündə 30 illik işğala son qoyub tarixi ədaləti bərpa etmək bütün dünyaya Azərbaycan dövlətinin gücünü, ordumuzun qüdrətini, xalqımızın birliyini, həmrəyliyini nümayiş etdirdi. Rəşadətli ordumuz 44 günün hər gününü Azərbaycanın tarixinə Zəfər səhifəsi kimi yazdı. Bu qələbə səhifələrini görmək üçün tarixi Zəfərimizin əbədiləşdiriləməsinə xidmət edən mühüm addımlar sırasında yer alan şəhər günlərinin təsis edilməsinə diqqət yetirmək kifayətdir. 44 günün hər günü bir şəhərin, kəndin, yaşayış məntəqəsinin işğaldan azad edilməsi ilə tarixə yazılıb. Şanlı Qələbəmizdən üç il sonra, 2023-cü ilin sentyabr ayında Azərbaycan Ordusunun Müzəffər Ali Baş Komandan, Prezident İlham Əliyevin rəhbərliyi ilə həyata keçirdiyi bir günlük antiterror tədbirləri nəticəsində suverenliyimizin tam bərpası ilə Xankəndidə, Xocalıda, Xocavənddə, Ağdərədə, Əsgəranda Azərbaycan Bayrağı ucaldıldı. Dövlətimizin başçısı İlham Əliyev tarixi Zəfərimizdən bəhs edərkən bildirir ki, 44 günlük Vətən müharibəsi əyilməz ruhumuzu, Azərbaycan xalqının iradəsini, dövlətimizin gücünü göstərdi. Xalq bir yumruq kimi birləşdi və cəmi 44 gün ərzində bütün tarixi və strateji vəzifələr təmin edildi. Bu 44 gün ərzində bir dəfə də olsun ordumuz geriyə addım atmadı, ancaq irəli getdi. Şuşanın azad edilməsi tarixi hadisə olaraq, eyni zamanda, İkinci Qarabağ müharibəsinə son qoydu. Çünki ondan sonra Ermənistan kapitulyasiya aktına imza atmağa məcbur oldu, qarşımızda diz çökərək ağ bayraq qaldırdı, təslim oldu və beləliklə, İkinci Qarabağ müharibəsi başa çatdı. Dövlət başçısı İlham Əliyev suverenliyimizin bərpasından sonra başlanan yeni dövrün başlanğıcı kimi dəyərləndirilən 7 fevral 2024-cü il tarixində keçirilən Prezident seçkilərində inamlı qələbəsindən sonra andiçmə mərasimində bir daha bu çağırışı etdi ki, növbəti illərdə qarşımızda duran əsas vəzifələrdən biri ordumuzun, Silahlı Qüvvələrimizin daha da gücləndirilməsidir. İkinci Qarabağ müharibəsindən sonra bu istiqamətdə çox böyük addımlar atıldı. Bu gün Azərbaycan Ordusu 2020-ci ildəkindən daha güclüdür və cəmi bir neçə saat davam edən antiterror əməliyyatı bunun bariz nümunəsidir.
Milli Məclisin deputatı bildirib ki, son illər şanlı döyüş yolu keçən Azərbaycan Silahlı Qüvvələri bu gün özünün ən qüdrətli mərhələsini yaşayır. Bu yolda mühüm yer tutan Aprel döyüşləri tarixdə 44 günlük İkinci Qarabağ müharibəsində şanlı Zəfərimizin müjdəçisi kimi əbədiləşdi.
Vüqar Rəhimzadə Aprel döyüşlərinin tarixi əhəmiyyəti sırasında həmin vaxtdan başlayaraq Böyük Qayıdış prosesinə start verilməsini xüsusi qeyd edib. Vurğulayıb ki, Lələtəpə yüksəkliyinin azad edilməsi nəticəsində Cəbrayıl rayonunun Cocuq Mərcanlı kəndində mülki əhalinin yaşayışı üçün təhlükə tamamilə aradan qaldırıldı. Prezident İlham Əliyevin Cocuq Mərcanlı kəndinin bərpası və əhalinin yerləşdirilməsi ilə bağlı 2017-ci ildə imzaladığı Sərəncama uyğun olaraq Böyük Qayıdış prosesinə start verildi. Cocuq Mərcanlı Böyük Qayıdışın ilk ünvanı oldu. Xalqımız bu qayıdışı böyük sevinc və qürur hissi ilə qarşıladı. Belə bir əminlik yarandı ki, tarixi torpaqlarımıza qayıdış davamlı olacaq. Bu gün Böyük Qayıdışın davamlı olmasının sevincini yaşayırıq. Tarixi sahibinə qovuşan torpaqlarımızda geniş miqyas alan bərpa-quruculuq işləri soydaşlarımızın bu ünvanlara mərhələ-mərhələ qayıdışı ilə müşayiət olunur. Tarixi Zəfərimizdən dərhal sonra başlayan bərpa-quruculuq işlərinin miqyası ölçüyəgəlməzdir. Əsas hədəf Böyük Qayıdış Proqramının icrasının birinci mərhələsinin başa çatacağı 2026-cı ilədək doğma yurd-yuvasına qayıdan soydaşlarımızın sayını 140 minə çatdırmaqdır. Dövlət başçısı İlham Əliyev bu günlərdə Ağdam rayonunun Sarıcalı kəndinə köçən sakinlərlə görüşündə bir daha diqqəti bu reallıqlara yönəltdi ki, artıq 13-cü yaşayış məntəqəsidir ki, keçmiş köçkünlər qayıdırlar. Azad edilmiş ərazilərdə indi 40 mindən çox insan yaşayır və çalışır. İlin sonuna qədər də təqribən 30 min, 40 min qayıtmalıdır.
Millət vəkili belə bir ümumiləşdirməni aparıb ki, Aprel döyüşlərindən başlanan yolun dövlətimizə və xalqımıza bəxş etdiyi qürurverici hadisələri, möhtəşəm uğurları sadalmaqla bitməz. Hazırda bütün işğaldan azad edilmiş ərazilərimiz dirçəlir, cənnət məkana çevrilir.
