Sabiq xarici işlər naziri, politoloq Tofiq Zülfüqarov son günlər Rusiya informasiya məkanında Azərbaycan əleyhinə aparılan kampaniya ilə bağlı “facebook” hesabında fikirlərini paylaşıb.
1xeber.media xəbər verir ki, sabiq nazir bu kampaniyanın arxasında duran məqsədləri ifşa edərək, Azərbaycanın mövqeyini geosiyasi baxımdan əsaslandırıb və rəsmi Bakını təmkinli, amma qətiyyətli mövqe tutmağa çağırıb.
Zülfüqarov bildirir ki, Rusiya mediasında və sosial şəbəkələrindəki “Z” təbliğatçıları Azərbaycanı imperiyanın “nəzarətdən çıxmış ucqarı” kimi təqdim edərək, guya bu bölgəyə qarşı hərbi müdaxilə ehtimalından danışırlar.
Onun sözlərinə görə, bu ritorika həm məntiqsiz, həm də qeyri-real ssenarilərə əsaslanır: “Bu iddialar nə hərbi-siyasi reallıqlarla, nə də Rusiya tərəfindən bəyan edilmiş strateji maraqlarla uzlaşır. Əgər Rusiya Cənubi Qafqazdan öz milli təhlükəsizliyi üçün təhlükə görmürsə, Azərbaycana qarşı hərbi təhdid ritorikası hansı məqsədə xidmət edir?
AZAL təyyarəsi ilə bağlı baş verən faciədə Rusiya tərəfinin qeyri-dost yanaşması, eləcə də Rusiyada azərbaycanlılara qarşı basqı və zorakılıq hallarına göz yumulması, iki ölkə arasında münasibətləri strateji tərəfdaşlıqdan “bitərəf qonşuluq” səviyyəsinə endirib. Əgər Rusiya tərəfi bu ritorikanı davam etdirərsə, münasibətlər geosiyasi qarşıdurma səviyyəsinə keçə bilər.
Bir vaxtlar Rusiya ilə mehriban qonşuluq edən Finlandiya, təhlükəni hiss etdikdən sonra NATO-ya üzv oldu. Azərbaycan da oxşar təzyiqlərə məruz qalarsa, bu, regionda qlobal dəyişikliklərə gətirib çıxara bilər.”
Tofiq Zülfüqarov qeyd edib ki, “hərbi ritorika” müxtəlif siyasi dairələr tərəfindən manipulyasiya edilir:
“-Liberal” rus müxalifətçiləri və Qərbpərəst şərhçilər – öz anti-Kreml ritorikalarında Azərbaycanı qurban kimi göstərsələr də, azərbaycanlılara qarşı nifrət mövqeyini qoruyurlar;
– Ukrayna mediası və ekspertləri – Azərbaycanla həmrəylik nümayiş etdirməklə yanaşı, “ikinci cəbhə” açılması ideyasını dolayı yolla təşviq edirlər;
– İranın radikal dairələrinə bağlı media qurumları – bu vəziyyətdən istifadə edərək, Azərbaycanla münasibətləri öz ideoloji prizmalarından şərh edirlər;
– Erməni və pro-erməni media strukturları – revanşist ritorika ilə “Azərbaycanın cəzalandırılması” zərurəti barədə təbliğat aparırlar;
Bu cür absurd “hərbi ssenarilər” əsasında müzakirə açmaq və bu ritorikaya cavab vermək Azərbaycan üçün faydalı deyil. Bizim analitiklər, ekspertlər və medianın əsas vəzifəsi bu təbliğatla eyni dildə danışmaq deyil, onu ifşa etməkdir. Biz düşmənin ssenarisinə yox, öz milli strateji gündəmimizə fokuslanmalıyıq”.
Tofiq Zülfüqarov Rusiyanın “Z-kanalları”nın ölkəmizə qarşı kütləvi informasiya hücumuna başladığını açıqlayıb. Onun sözlərinə görə, o, “ölkəmizin internet məkanına kütləvi hücuma keçmiş” Rusiyanın təbliğat resurslarının fəaliyyətini mümkün qədər izləyib və təhlil edir.
Sabiq nazirə görə, mütəşəkkil bir kampaniya belə bir tezis yayır ki, guya Rusiya hakimiyyətinin mövqeyi Azərbaycan xalqına deyil, sadəcə, “Azərbaycanın qərbyönlü hakimiyyəti”nə qarşıdır. Həmçinin Zülfüqarovun fikrincə, “daxili müxalifət” adından ölkə rəhbərliyini tənqid edəcək idarə olunan ruporların meydana çıxması mümkündür.
Zülfüqarov iki ay əvvəl bu istiqamətdə xəbərdarlıq etdiyini xatırladıb: “Qarabağ təzyiq mexanizmi itirildikdən sonra xarici qüvvələr regiona yeni təzyiq modelini işə salmağa çalışacaqlar. Bu gün ölkədə sabitliyi pozmağa cəhd ediləcəyi açıq-aydın görünür, çünki informasiya hücumu artıq başlayıb. Lakin bu cəhdin uğursuzluğa məhkum olduğu da göz qabağındadır, çünki Azərbaycanda cəmiyyətin konsolidasiya səviyyəsi Rusiyanın özündə, məsələn, Gürcüstan və Ermənistandakından xeyli yüksəkdir”.”AzPolitika. info”
