ABŞ-nin İranın nüvə obyektlərinə son zərbələrindən sonra Yaxın Şərqdə gərginlik kritik həddə çatıb. Körfəz ölkələri və İraq İranın mümkün cavabını gözləyərək görünməmiş təhlükəsizlik tədbirləri görüblər.
1xeber.media məlumatına görə, ən çox ehtimal olunan variantlara ABŞ-nin bazalarına və regiondakı hərbi obyektlərinə zərbələr endirilməsi daxildir.
Qətər
ABŞ-nin Qətərdəki səfirliyi fövqəladə xəbərdarlıq elan edərək, vətəndaşlarına növbəti xəbərdarlığa qədər olduqları yerlərdə sığınmağı tövsiyə edib. Amerikalılara göndərilən ismarışda deyilir ki, qərar ehtiyatlılıq səbəbindən verilib. Xəbərdarlıq ötən həftə səfirlik işçilərinin Qətərdə yerləşən Yaxın Şərqdəki ən böyük ABŞ hərbi bazası olan əl-Udeydə girişini məhdudlaşdıran müvəqqəti qadağadan sonra edilib.
Bir sıra KİV-in məlumatına görə, ABŞ komandanlığı bölgədəki qüvvələrinin təhlükəsizliyini təmin etmək üçün tədbirlər kompleksi çərçivəsində ötən həftə əl-Udeyd bazasından aviasiyanın bir hissəsini təxliyə edib.
ABŞ-nin ardınca Böyük Britaniya da oxşar çağırış edib. Britaniya hökuməti öz saytında yazıb: "ABŞ-nin xəbərdarlığından sonra ehtiyat tədbiri olaraq Qətərdəki Böyük Britaniya vətəndaşlarına növbəti xəbərdarlığa qədər yerlərdə qalmalarını tövsiyə edirik".
Qətər Xarici İşlər Nazirliyi də öz növbəsində rəsmi açıqlama verib. Vurğulanıb ki, müxtəlif səfirliklərin öz vətəndaşlarına Qətərdə ehtiyatlı olmaq və ya müəyyən ərazilərdən qaçmaq tövsiyələri, bir çox ölkənin səyahət tövsiyələri və təhlükəsizlik xəbərdarlığı ilə bağlı əməl etdiyi standart təcrübənin bir hissəsidir.
Nazirlik, həmçinin əmin edib ki, ölkədə təhlükəsizlik vəziyyəti sabit olaraq qalır. Qeyd olunub ki, hakimiyyət orqanları hadisələri diqqətlə izləyir, vətəndaşların, sakinlərin və ölkəyə gələn qonaqların təhlükəsizliyini təmin etməyə tam hazırdır.
Bəhreyn
Bəhreyndə ABŞ hərbçiləri və mülki şəxslər bir neçə gündür, xüsusən də ABŞ 5-ci Donanmasının bazası ətrafında yüksək hazırlıq vəziyyətindədirlər. Mövcud məlumata görə, ABŞ komandanlığı bu strateji əhəmiyyətli ərazidən şəxsi heyəti qismən təxliyə edib.
Səudiyyə Ərəbistanı
ABŞ-nin Səudiyyə Ərəbistanındakı diplomatik nümayəndəliyi rəsmi xəbərdarlıq edərək, krallıqdakı vətəndaşlarına vacib olmayan səyahətlərdən qaçmağı və regional gərginliyin artması fonunda strateji obyektlərdən uzaq durmağı tövsiyə edib.
ABŞ
ABŞ-nin yüksək rütbəli rəsmiləri "Reuters" agentliyinə ciddi narahatlıqlarını ifadə edərək, rəsmi Vaşinqtonun İranın ABŞ qüvvələrinə qarşı bir və ya iki gün ərzində gözlənilməz qisas riskini gördüyünü bildirib. Lakin onlar vurğulayıb ki, ABŞ münaqişənin diplomatik həllinə sadiq qalır.
Adının çəkilməsini istəməyən ABŞ rəsmisi iyunun 22-də “New York Times” qəzetinə bildirib ki, hərbi və kəşfiyyat rəsmiləri ABŞ-nin İrana zərbələrinə cavab olaraq iranpərəst milislərin İraq və ola bilsin, Suriyadakı ABŞ bazalarına hücum etməyə hazırlaşdıqlarına dair əlamətlər aşkar ediblər. Rəsmilərin sözlərinə görə, milislərin hərəkətləri hələlik dayandırılıb və İraq rəsmiləri onları münaqişənin qızışdırılmasından çəkindirmək üçün intensiv diplomatik səylər göstərir.
İraq
ABŞ-nin İrana zərbəsi nəticəsində İraqdakı silahlı birləşmələr bu ölkədə, eləcə də Fars körfəzi ölkələrində Ağ Evin maraqlarına qarşı cavab tədbirləri üçün fəal şəkildə hazırlaşır. Ən fəal qruplar arasında “Kətaib Hizbullah”, “Seyid əş-Şühəda”, “Asaib Əhli-Haq”, “Hərəkət əl-Nücəbə” və bir neçə başqa qruplaşma var.
Bu arada milis komandirləri və döyüşçüləri İsrail və ya ABŞ tərəfindən hədəfə alınan sui-qəsdlərdən qorxaraq bazalarını və evlərini boşaldıblar. Etibarlı mənbələrdən verilən məlumata görə, onlar özləri və ailələri üçün telefon nömrələrini və gizləndikləri yerləri də dəyişiblər.
İraq hökuməti qisas almaqdan ehtiyatlanaraq ABŞ-nin Bağdaddakı səfirliyi və digər strateji obyektlər, eləcə də milli sərhədlər yaxınlığında əhəmiyyətli əlavə qüvvələr toplayıb. İraq liderləri və yüksək rütbəli rəsmilər dəfələrlə onların ölkələrinin növbəti hədəfəvə gərginləşən regional münaqişədə növbəti döyüş meydanına çevrilə biləcəyindən narahatlıqlarını ifadə ediblər.
İraq Milli Neft Şirkətindən verilən rəsmi açıqlamaya görə, ölkənin neft yataqlarında fəaliyyət göstərən ENI (İtaliya), BP (Böyük Britaniya) və TotalEnergies (Fransa) da daxil olmaqla iri enerji şirkətləri işçilərinin bir qismini təxliyə etmək qərarına gəliblər.
Aviaşirkət
Fransanın “Air France” aviaşirkəti iyulun 14-dək Yaxın Şərqdəki istiqamətlərə uçuşlarının tamamilə ləğv edildiyini açıqlayıb. Bir gün əvvəl "British Airways" də ABŞ-nin İrana zərbələrindən sonra Dubay və Qətərə uçuşları dayandırmaq qərarına gəlib.
