İpoteka və Kredit Zəmanət Fondu (İKZF) satmaq öhdəliyi ilə kirayə mexanizmi çərçivəsində Bakıda daha 150 yeni, tam təmirli mənzili vətəndaşlara təqdim edib. Bildirilib ki, mənzillərin yaşayış sahələri 1, 2 və 3 otaqlı olmaqla, aylıq ödənişləri 954 manatdan başlayır.
Kirayə mexanizmi ilə mənzil satışı ölkədə daşınmaz əmlak bazarına necə təsir edir? Bu model qiymətlərin sabitləşməsinə kömək edir, yoxsa bazarda süni qiymət artımı yaradır?
1xeber.media xəbər verir ki Globalinfo.az-a danışan əmlak məsələləri üzrə ekspert Elnur Azadov deyib ki, İpoteka və Kredit Zəmanət Fondunun təqdim etdiyi kirayə mənzillər vətəndaşlara sərf edir:
“Sözügedən sosial layihə vətəndaşların şəraitini yaxşılaşdırmaq üçün həyata keçirilir. Demək olar, İpoteka və Kredit Zəmanət Fondu hər il Bakı və 9 iri şəhərlərdə ictimai sorğu keçirir. Buna əsasən, tələb təyin edilir. Nəticəyə uyğun olaraq, qurum açıq bazarda olan tikinti şirkətlərindən kütləvi şəkildə təmirli mənzillər alır. Sonra isə həmin evləri vətəndaşlara uzunmüddətli kirayə qiymətinə təklif edir. Əgər ipoteka üçün vətəndaş ilkin 15-20 faiz ödəniş etməlidirsə, bu, ən azı 15-20 min manat deməkdir. Kirayə mexanizmi ilə Bakıdan bir az kənarda 12 ayın pulunu öncədən ödəmək daha əlverişlidir. Bundan başqa, vətəndaş ödəniş etdiyi müddət ərzində kirayə qiyməti dəyişmədən qalır. Ümumiyyətlə, kirayə mexanizmi çərçivəsində satışa çıxarılan mənzillərin sayı çox olmadığına görə ümumi bazarın 1-2 faizini təşkil etmir”.
Ekspert bildirib ki, son illərdə tikinti şirkətlərinin aktivliyi azalıb, binaların sayı məhdudlaşıb:
“Qiymətlər çox bahalaşdığına görə İKZF bazarda ucuz mənzillər tapa bilmir. Nəticədə dövlət və fondun vəsaiti bura yönəldilir. Bazarda təklif çox olsa, tikinti şirkətləri aktivləşsə, seçimlər artardı. Lakin indi fondla əməkdaşlıq edən təşkilatlar da azdır. Yəni seçim az, qiymət nisbətən yüksəkdir”.
