Azərbaycan Dövlət İqtisad Universitetinin (UNEC) rektoru, professor Ədalət Muradov, Riyaziyyat və Mexanika İnstitutunun direktoru professor, Misir Mərdanov, Azərbaycanda Atatürk Mərkəzinin direktoru, akademik Nizami Cəfərov, təhsil üzrə ekspert, fəlsəfə doktoru Etibar Əliyev və UNEC rəsmiləri Azərbaycan Dövlət Aqrar Universitetində (ADAU) olublar.
1xeber.media xəbər verir ki, universitetin professor-müəllim heyəti ilə görüşdə birgə əməkdaşlıq çərçivəsində həyata keçirilə biləcək layihələr müzakirə olunub
Çıxış edən ADAU-nun rektoru Zəfər Qurbanov qonaqları salamlayaraq, bir əsrlik tarixə malik Aqrar Universitetin maddi-texniki bazası və qarşıya qoyduğu hədəflər barədə ətraflı məlumat verib.
UNEC rektoru, professor Ədalət Muradov çıxışında tədqiqatçıların birgə mübadiləsi, yüksək reytinqli jurnallarda məqalə çapı, həmçinin beynəlxalq nüfuzlu reytinq siyahılarında qərarlaşmaq üçün hədəflər və birgə görülə biləcək işlər barədə danışıb.
Professor Misir Mərdanov Azərbaycan Dövlət Aqrar Universitetinin kollektivini salamlayaraq burada olmaqdan məmnun olduğunu dilə gətirib. O bildirib ki, Aqrar Universitet dövlətin əsas prioritet sahələrindən olan aqrar sektora kadr hazırlayan ali təhsil müəssisəsi kimi daim diqqət mərkəzindədir.
Akademik Nizami Cəfərov deyib ki, qeyri-neft sektorunda böyük rolu olan kənd təsərrüfatı ixtisasları üzrə mütəxəssis hazırlığının ölkəmiz üçün mühüm əhəmiyyəti danılmazdır.
Sonda universitetə xatirə kitablar təqdim olunub
