Maliyyə naziri Sahil Babayev Dünya Bankının yeni icraçı direktoru ilə prioritet məsələləri müzakirə edib.
Fevralın 28-də Maliyyə Nazirliyində Dünya Bankının Azərbaycanın da daxil olduğu seçki qrupu üzrə yeni təyin olunmuş İcraçı direktoru Beatris Meyzer ilə görüş keçirilib.
Maliyyə naziri Sahil Babayev Azərbaycanın Dünya Bankı ilə əməkdaşlığından məmnunluğunu ifadə edib, Azərbaycan hökumətinin bu əlaqələrin genişləndirilməsində maraqlı olduğunu bildirib. Uzun illər ərzində Dünya Bankı ilə əməkdaşlıqdan Azərbaycanın faydalandığı, müxtəlif sahələr üzrə maliyyələşdirilən layihələrin, göstərilən texniki yardımların ölkəmizin sosial iqtisadi inkişafına böyük töhfə verdiyi qeyd olunub.
Görüş zamanı Azərbaycanla Bank arasında ölkə üçün prioritet sahələr üzrə müəyyən olunmuş istiqamətlərdə mövcud və icrasına başlanılacaq layihələr nəzərdən keçirilib.
S.Babayev qonağı yeni təyinatı münasibətilə təbrik edərək fəaliyyətində ona uğurlar arzulayıb, əvvəlki İcraçı direktorlar kimi Bankla Azərbaycan arasında tərəfdaşlığın genişləndirilməsində əhəmiyyətli rol oynayacağına əminliyini ifadə edib.
